Ka West Jaiñtia District Sports Association (WJDSA), Jowai mynta ka sngi saitjaiñ 18.07.2026, kala pynkup burom ïa u ma Khroobok Passah uba dei u District Sports Officer ba rim ka WJHD halor ki kam kiba ula synñiang hapoh ka District ban pynkiew ïa ka kam ïalehkai Sports ha kiba bun ki liang bad mynta ula long kum u Assistant Director of Sports & Youth Affairs jong ka jylla.
Ha kane ka sngi la donlang ki dkhot ka Executive Body ka WJDSA, kiba kynthup ïa u Working President ma EMH Passah, Vice-President ma Patrick Lamare, Hony. General Secretary ma Lammat oo Laloo ryngkat ki Executive member ka WJDSA, ka lok bad u khun jong u ma K. Passah nalor kiwei de. Ka WJDSA kum ka dak ban burom ïa u ma K. Passah kala ai sngewbha ïa u da ka memento kumjuh ka sati ksiar bad ka jaiñ ryndia.
U ma Passah ha ka jingkren ula ong ba ha u snem 2020, ula wan shimti kum u DSO ka West Jaiñtia Hills District. Shuh shuh ula pynpaw ïa ka jingkiew shaphrang jong ka District haka kam ïalehkai phubol ha ki snem ba u long kum u DSO, kaba la pynsngewkmen shuh shuh ia u ka long ba haduh lai tylli ki skul jong ka Diatrict kila ïoh ban leit mihkhmat ïa ka jylla sha nongbah Delhi ha ka Subroto Cup Mukherjee.
Ula ong ruh ïa ki kam kiba ka Association kala leh ban shna pynbha ïa ka madan Kiang Nangbah Stadium kaba dang ïaid shakhmat mynta da ka jingïatreilang bad u MLA ka Jowai ma Wailadmiki Shylla, nalor ka jingjop jong ka 6th Meghalaya Games bala dep pynlong hapoh ka District.
Haba pynkut u khot ïa ki dkhot ka WJDSA ba kin trei shitom ban pynkiew ïa ka kam ïalehkai Sports hapoh ka District namar ka kam ïalehkai Sports ka dei kawei na ki lad kaba lah ban pynïohkam ïa ki khun samla mynta, u kyntu ruh ban don ka jingïatreilang na ka bynta ka National Games 2027, ka ban long hapoh ka Jylla namar ki don ki katto katne tylli ki jingialehkai (Games) kiba hap ban pynïalehkai hapoh ka West Jaiñtia Hills District.
