Ki Nongialam ka KSU Nongmynsong Unit mynta ka sngi ka 15 tarik Naitung 2025 ki la wan iakynduh ia u Myntri ka tnad Power u AT Mondal ban iakren haba iadei bad ka jingkiew ka bill light ki nongshongwai kiba shong ba sah ha (Basic Urban Poor) BSUP Complex Nongmynsong kiba hap hapoh ka BPL (Below Poverty Line).
Haba kren sha ki lad pathai khubor na ka liang u President ka KSU Nongmynsong Unit u J Pothmi u la pynpaw ba ka jingwan kynduh ia u Myntri ka tnad Power ka dei hadien ka jingkiew syndet ka bai light bad ka jingkylliang meter ka sorkar ia ki nongshong wai kiba shong ba sah ha BSUP Complex Nongmynsong.
Shuh shuh u la pyntip ba ki nongshongwai ki ju siew 500 tyngka ne 600 tyngka ha ka 2 bnai, hynrei naduh ba wan buh da u Prepaid Meter ki ka bai bill light ka poi 65 tyngka wat haduh 150 tyngka ruh ka poi ha ka shisngi, da khein ia kata ka shisngi ha ka shibnai ka poi da ki 2 hajar 3 hajar, bad kane ka buh jingeh ia ki nongshongwai ba sah hatei ka BSUP Complex, namar ki wan na ka longïing ba duk ba kyrduh kiba kamai mynstep bam da miet.
Shuh shuh u la pyntip kiba sah wai hatei ka Complex, ki siew ia ka bai wai 900 tyngka bad lada ka bill light ka poi 2 hajar 3 hajar tyngka kata ka long ka bym iahap bad na ka liang ka KSU Nongmynsong Unit kam pdiang ia kane.
U la pyntip ruh ba ka jingiakynduh bad u Myntri ka tnad ka seisoh bad u Myntri u la kular ban shimkhia ia kane ka kam haba iadei bad kane ka jingkiew ka Bill light jong ki nongshongwai ha BSUP Complex Nongmynsong.
