Ka Khasi Student Union (KSU), ka la pynlong biang ia ka jingialang paidbah jong ka sa ha nongbah Jowai, ia kaba la pynlong ha Iawmusiang, Jowai mynta ka sngi 13 tarik Nailar, kaba la dep ruh ban pynlong ha kiba bun ki District jong ka jylla ha ka jingiadei bad ki san tylli ki mat jingdawa jong ka seng na ka sorkar. Ha ka jingialang na ka liang ka seng la dep ban buh bor hapoh 15 sngi ia ka sorkar ka ban kut haduh ka 18 tarik mynta u bnai, ha kaba na ka liang ka seng ka la maham ba lada ka sorkar kam pyntrei kam ia kine ki san tylli ki mat jingdawa ka seng kan bteng da ki jingiakhih kiba kham tyngeh shuh shuh.
Kine ki san tylli ki mat jingdawa, ki long kaba nyngkong kaba dei kawei na ki mat ba kongsan, Ban pynduh ïa ka Public Hearing jong ka Shree Cement kaba la long ha ka 31 tarik Naitung. Kaba ar ka jingdawa ka long ban pyntreikam ïa ka MRSSA (2016), kaba lai ka long ban pynurlong noh ia ka Amendment, ia ka Meghalaya Identification, Registration (Safety & Security) of Migrant Worker Act, 2020. Kaba saw ban pynbeit noh ia ka jingthungkam ha NEIGRIHMS, kat kum ka jingkular ba la ai bad kaba san ka long ban pynlong ia ka jing thungkam kaba shai, kaba hok bad kaba khuid, da kaba pynduh ia ka personal interview, ban wanrah jingkylla ha ka MPSC bad DSC bad thaw ia ka Standard Operating Procedure (SOP), na ka bynta baroh kiwei pat ki Recruitment board.
Ha ka jingiadei bad kine ki jingdawa jong ka KSU na ka laing ki nongialam jong ka seng ka khot bad wer ia baroh naduh ki samla pule, ki rangbah kiba trei ha kano kano kam ban ia snoh kti lang ka seng, namar baroh kine ki jingdaw kim dei na ka bynta ka seng, hynrei ki dei na ka bynta ka jingmyntoi ha ka lawei jong ka jylla hi baroh kawei.
Mynta ka sngi la ioh ia ki jingkren na u Laitphar Syngkrem President KSU West Jaintia, Streemly Suchen President KSU East Jaintia, Manbha Nongtdu President Hima Sutnga Youth Federation (HSYF), Badon Malniang Assistant Sports Secretary KSU-CEC, Hopefull Born Lyngdoh Mawnai Assistant Finance KSU CEC, Shiningstar Kharbihkhiew Environmental Secretary, katba ia ka jingialang pat la pyniaid da u Leningard Tariang General Secretary KSU WJHD. Hadien ka jingialang paidbah ki dkhot jong ka seng ki la iashim bynta lang ha ka jingrwai ieit ri jong ka seng KSU.
