U Myntri Rangbah ka jylla u Conrad K Sangma ha ka 25 tarik Lber 2026 u la plie pyrda ia ka 1st Shillong International Film Festival ha State Convention Shillong.
Ha kane ka sngi ba plie pyrda ia ka 1st Shillong International Film Festival la ia don lang u Myntri ka tnad Information & Public Relations u Bah Lakhmen Rymbui, u Chief Secretary ka jylla ki ophisar ka tnad information & Public Relations, ki nongshna film na nongbah Shillong bad kiwei kiwei. Kane ka dei ka sienjam ba nyngkong eh ha ka Jylla ba ka Sorkar Meghalaya, lyngba ka Directorate of Information & Public Relations (DIPR), ka la pynlong ia kum kane ka lympung ban kyntiew ia ka sap thoh drama, ka kam ak phlim, bad ka rukom ring dur kaba long katkum ka juk mynta.
Na ka liang u Myntri Rangbah ka Jylla, u Conrad K. Sangma haba kren ha kane ka sngi u la pynpaw ba kane ka Festival ka dei tang ka jingsdang.
Nalor kata u la ong kumba 50 na ka 100 jong ki nongshong shnong ka Meghalaya ki dei ki samla hapoh 20 snem ka rta. “Ngi dei ban thaw ia ka lad ioh kam ioh jam lyngba ka sap ka talen jong ki la ong u Myntri Rangbah.
Shuh shuh u la ong ka Meghalaya ka dei ka Jylla kaba nyngkong ban don la ka jong ka platform kaba ai rynsan ia ki nongshna phlim, video, bad documentaries lyngba ki OTT Platform.
U Myntri Rangbah u la iathuh ruh ba haduh 35-40 klur tyngka la dep sam sha ki 7,000 ngut ki nongtem lyngba ka Meghalaya Grassroots Music Program. U la pyniasyriem ia kane ka jingthmu bad ka jingthmu ban shna ia ka stadium football kaba heh (40,000 ngut) ban pdiang ia ki band kiba khraw kum ka Def Leppard ne Scorpions, da ka thong ban pyni ba ka Meghalaya ka bit ka biang ha kiei kiei baroh.
U Myntri ka tnad Information & Public Relations, u Bah Lahkmen Rymbui, haba kren ha kane ka lympung, u la kyntu ia ki samla ban shim ia kane ka sienjam kaba ka sorkar ka la plie lad na ka bynta jong ki.
“Ka sorkar ka la plie ia ka lynti ia baroh ki tnad—naduh ka thoh screenplay haduh ka shna phlim. Ki samla kim dei shuh ban ud ba kim don lad ban pynbit pynbiang ia lade,” u la ong.
U la ai nuksa ba kawei ka phlim ha Ri India ka lah ban kamai haduh 953 klur tyngka, bad u la kyntu ia ki samla ban synniang sha ka thong ka Jylla ban poi sha ka 10 Billion Dollar Economy. U la ai burom ruh ia ki nongshna phlim kiba la seng nongrim naduh u snem 1981.
Kane ka festival kaba lai sngi kan long ka rynsan ia ki khynnah skul bad ki samla ban iashim bynta ha ki jingai jinghikai (workshops) bad ki lympung iakop shna phlim lyngkot (short films).
