Ka Dorbar Shnong Mihmyntdu, West Jaiñtia Hills District kum ka dak ban pynshlur ïa ki samla pule jong ka shnong, mynta ka sngi Palei kala pynlong ïa ka prokram pynkup burom ïa ki samla pule kiba la pass bha haki Examination HSSLC bad SSLC ïa kaba la tip kum ka ‘4th Felicitation Award 2026’.
Ïa kane ka prokram la pynlong ha Lumpyrdi Mihmyntdu, ha kaba u myntri ka koit ka khiah bad ka kam ïalehkai Sports jong ka sorkar jylla u ma Wailadmiki Shylla ula long kum u kongsan, haka jingdonlang u Principal ka North Liberty Higher Secondary School Sir. Richars Uriah, u MDC ba shu sieh ma Octomewot Lamin, u Waheh Shnong Mihmyntdu ma Abul Phawa, ki waheh Dong ka shnong, ki samla pule, ki kmie ki kpa lem lem bad ki nongshah khot sngewbha.
Baroh ki samla pule jong ka shnong kiba la shah pynkut burom ha kane ka sngi kila don haduh 63 ngut napdeng ki don haka Class XII jong ka Scienc, Arts & Commerce ki don 28 ngut, haka Class-X ki don 31 ngut, ki samla pule kiba pass wat hapdeng ka jingduna hi ki dkhot met ki don 2 ngut, la ai khusnam ruh ïa u Dr. Sammarjanki Rymbai MBBS, M.S (Orthopaedics) bad 1 sha ka nongïalehkai Sport. Haka juh ka por ka DS kala sam khusnam sha ki ar tylli ki skul hapoh ka shnong kiba la pass 100% Percentage.
Naka liang u kongsan ma Wailadmiki Shylla haba ai jingkren ula ïaroh ïa kitei ki samla pule jong ka shnong Mihmyntdu kiba la poi shakhmat haki jingpule, da kaba kyntu bad kitbok kitrwiang ba kin nangïai kiew shaphrang ha ki jingpule bad ban ïakhun ban pass ïa ka Exam UPSC na ka bynta ki kam IAS, IPS bad kiwei de namar mynta ym don shuh kiba pass ïa kaen ka Exam napoh ka jylla.
Ula ai khublei ïaka Dorbar Shnong kaba la lah ban pynlong ïa kum kane ka prokram ha ka sien kaba saw, da kaba kular kum u kongsan ban ai jingïarap ïa kane ka jingpynkhreh da ka song pisa kaba 50 hajar tyngka.
Shuh shuh ula pynsngew ka por mynta ka long kaba donbok eh bad ka long ruh ka por kaba sniew bok eh namar ka jingdon jong ka juk Technology kaba la don lypa ha ka kti, kumta u kyntu ïa ki samla pule ba kin nang bha ban pyndonkam namar ka por jingïaleh kala kiew bha shaba palat.
Ha ka liang ka ïoh kam ïoh jam ula ong kiba bun hi ki pynleit jingmut tang ha ki kam DSC, MPSC katba ha ki laiñ ba kham shalor ym don kiba bteng ban leit pule bad kane kala buh jingeh ïa ka jylla hi baroh kawei ong u ma Wailad. Daka kyntu hadien bala dep ïa ki jingpule dei ban wan trei shapoh ka jylla bad ban pynkiew ïa ka shnong ka thaw ha baroh ki liang.
