Ka Spark Meghalaya ka la pynlong ïa ka District Talent Event 2026 ha Don Bosco College, Byndihati, East Jaiñtia Hills District, mynta ka sngi 14 tarik u Nailar, 2026.
Ka jingïalang ka la pyni ïa ki sap bad ki jingtbit jong ki khynnah skul, na ki skul bapher bapher jong ka East Jaiñtia Hills District lyngba ki sap ka phong kum ka rwai, ka shad bad kiwei de. Ha kane ka prokram la ban wan iashim bynta da ki nonghikai, ki ophisar jong ka Spark Meghalaya, DSEO ka East Jaiñtia Hills District bad u Riki Dame Diengdoh.
Ki skul kiba wan shim bynta ki kynthup ïa ka Little Star Secondary School, Little Flower Secondary School, Rymbai Govt. HSS, Ambrose Memorial Secondary School, Chiehruphi Secondary, Tluh Higher Secondary School bad Little Star Secondary School.
U DSEO ka East Jaiñtia Hills District, haba kren ha ka Spark Meghalaya District Talent Event 2026 ha Don Bosco College, Byndihati, u la ong ba baroh ki khynnah skul kiba don ha katei ka jingïalang ki la pyni ïa ka jingaiti, ka jingtrei shitom bad ka jingshlur ban mih shakhmat ban pyni ïa ki sap bad ki jingtbit ba kyrpang jong ki.
U la ai jingïaroh ïa ka Sorkar Meghalaya kaba la wanrah ïa ka Spark Meghalaya, kaba long ka sien jam ban ai lad ïa ki khynnah skul ban lap ïa ki sap bad ka jinglah jong ki naduh tynrai. U la ong ruh ba ka jingpule kam dei tang ha ka akademik (Academic), hynrei ka kynthup ruh ïa ka jingpynsan ïa ka jingmut ban thaw thymmai, ka jingïalam, ka jingpynlong thymmai bad ka sap ka phong. U la ai khublei ïa baroh kiba la don bynta ha ka prokram ban pynlong ïa ka kaba jop, bad u la kyntu ïa ki khynnah skul ba ka jingjop kam dei tang ka jingïoh khusnam, hynrei man la kawei pa kawei ka jinghikai kaba ki ïoh ka noh synñiang sha ka jingroi bad ka jingkyntiew ïa lade ha ka jingïaid lynti jong ki.
U la bynrap da kaba ong, “U briew uba trei shitom un ïoh ïa ki soh jong ka jingtrei jong u hadien,” bad u la pynpaw ba uwei pa uwei u khynnah u lah ban tyngshaiñ bad paw namar u pyndonkam ïa ki sap ba U Blei u la ai ha u.
