Ka Jaintia Revolutionary Council (JRC) ka pynrem jur iaka District Administartion halor ka jingleh jong ka ban phah da ki Doctor Mrad (Veterinary Doctor) ban peit bniah ia ka koit ka khiah jong u Bah Marshal SB Biam.
Kane ka jingleh jong ka sorkar kadei ka jingleh bym don nongrim ka District Administration kaba la phah da u doktor mrad (veterinary doctor) ban peit ïa ka koit ka khiah jong u Bah Marshall Biam, uba dang shong shah thngan (hunger strike) ban pyrshah ïa ka jingkhang tih dewiong ha Jaintia Hills.
Kumba la sakhi ha ki ladpathai khubor la iathuh ba kane ka jingleh ka sorkar ka long kaba la pynbitar ïa baroh ki paidbah bad ka pynpaw shai ba ka District Administration ka kheiñ sting bad ka leh khlem akor ïa ka jingim briew. Ka JRC ka pynpaw ba ka jingphah da u doktor mrad ban peit ïa u briew uba shah thngan ka long ka jingkhein-doh-khein-snier bad ka jingtim ïa ka hok ban ioh ka jingsumar ba dei hok.
Ha kane ka jingpyrshah, ka JRC ka dawa ba ka District Administration ka dei ban panmap na u Bah Marshall SB Biam bad na ka jaidbynriew baroh kawei halor kane ka jinglong kaba la pynbudnam. Ka JRC ka dawa ba ka sorkar ka dei ban phah mardor da u doktor MBBS ne ki nongtrei kiba tbit (medical professionals) ban peit ïa ka koit ka khiah jong u Bah Marshall bad ym da kiwei pat kiba ym don jingiadei eiei bad ka jingsumar briew.
Ka JRC ka pynkynmaw ïa ka Administration ba ka jingiakhun ka long halor ka hok bad ka jingim bad lada jia ei ei ïa u nongïakhun, ka sorkar hi ka dei ka ban bahkhlieh.
Ka JRC ka dang pynpaw ba kam shym la kynran dien na ka jingdawa ban pynkylla ïa ki kyndon tih dewiong bad ka kyntu ïa ki paidbah ban long kiba la pynkhreh ban pynpaw ka jingpyrshah lada ka sorkar ka dang pynlong-biej ïa u paidbah.
Kane ka long katkum ka kyrwoh ba la phah da u bah L.Suiam, President JRC Central Body.
