Hadien ba mih ka khubor ha ki lad pathai khubor ha ka 2 bad 3 tarik mynta u bnai, ha kaba ïadei bad ka jingkynnoh u Waheh Shnong bad u Assistant Waheh Shnong, Mynkrem ïa u Daloi Elaka Shangung, Waheh Chanki Langbang ba u lehbor ïa ka Khlaw jong ka Dorbar Shnong Mynkrem bad ki la kynnoh ruh ba u Waheh Shnong Mynkrem u la shah maham ha u Daloi, kumta ki dkhot jong ka Dorbar Elaka baroh ki la dap da ka jinglyngngoh bad ka mynsiem ba sngewkhia halor katei ka jingkynnoh jong u Waheh Shnong bad Assistant Waheh Shnong Mynkrem. Kumta haka 04/08/2026, ka ophis jong ka Dorbar Elaka ki la pynlong ïa ka Dorbar bah jong ka Elaka Shangpung ha ka jingïadonlang jong ki Waheh Shnong, Assistant Waheh Shnong bad ki nongkitkam shnong jong ki 30 (Laiphew) tylli ki Dorbar Shnong bad ki khun ki hajar jong ka Elaka na ka bynta ban ïa kren sanibha ha kaba ïadei bad kane ka jingshahkynnoh shimet u Daloi ban die ïa ki dieng na katei ka Khlaw.
Kumta ka Dorbar Elaka ka kwah ban pynshai ïa ka jingshisha, ba ha ka jingïalang jong ka Dorbar Elaka kaba la long ha ka 14/12/2024 ha ophis treikam jong ka Dorbar Elaka, ki la rai bad monjurlang kum ka Dorbar Elaka ban die ïa ki dieng na ki khlaw jong ka Elaka Shangpung. Kumta ha une u bnai Naitung mynta u snem ka Dorbar Elaka ka la ïoh jingtip ba don ki dieng kiba la shah khyllem ha ka jingjur jong u lyer ha ka Khlaw Lakaweng, kumta ka Dorbar Elaka ka la ai bor ha u Daloi ban phah briew ban ot ïa kita ki dieng ba la khyllem hynrei ynda kita ki briew ki la mut ban leit ot ïa kita ki dieng, ki la shah khang ha u Waheh Shnong jong ka Mynkrem. Kumta hadien ba u Daloi u la ïoh jingtip na uta u briew ba mut ban ot ïa kita ki dieng ba u la shah khang ha u Waheh Shnong Mynkrem, kumta u Daloi u la phone sha u Waheh Shnong Mynkrem da ka sur kaba jem kum u khlieh nongsynshar ïa ka Elaka “Balei me khang ïa kito ki briew ban ot ïa kito ki dieng, namar ba kane ka khlaw ka dei jong ka Elaka, bad u da ong ruh peit ïoh kito ki dieng kin shu pyut ei”, ym ban maham ïa u da kumwei kumba u Risnainlang Langstang, Waheh Shnong Mynkrem u la kynnoh.
Ha kaba ïadei bad ka jingong jong u Waheh Shnong Mynkrem ba u Daloi u thmu bunsien ban thombor ïa kane ka khlaw kumba u la kdew ha ka 01/04/2025 ba u Daloi bad ki kynhun jong u ki la leit pynpait ïa ki maw sieh pud na ka bynta jong ka Khlo Raij shaphang South bad khlo Dorbar Shnong North, kumta ka Dorbar Elaka ka kwah ban pynshai ïa kane ka jingkynnoh kumne “Haoid ha katei ka tarik ba la kdew kumba la juh mlien ki dkhot ka Dorbar Elaka ryngkat bad u Daloi ban leit peit ïa ki jaka ne ki khlaw jong ka Elaka manla ka por, jia ryngkat ba ha katei ka sngi ki leit peit sha katei ka khlaw “Lakaweng”, ki la lap ba don ki mawpud kiba dang shu dep sieh shen khlem ka jingtip jong ka Dorbar Elaka, kumta ki dkhot ka Dorbar Elaka ki la pynpait ïa kitei ki mawpud, ym dei u Daloi ba pynpait ïa ki mawpud kumba la kynnoh da u Waheh Shnong Mynkrem. Bad ha ka juh ka por ruh ka Dorbar Elaka ka pynshai ba ha kane ka jaka ym don kata Khlaw Raij bad khlaw Dorbar Shnong kumba la ong da u Waheh Shnong Mynkrem. Namar naduh mynbarim kane ka dei ka Khlaw jong ka Elaka bad dei ka Elaka kaba peit ba sylli bad ba long hok halor kane ka Khlaw.
Ha kaba ïadei bad ka shithi 12/04/2025 ba ong u Waheh Shnong Mynkrem ba u la dep phah shithi sha u Daloi hynrei u Daloi um leh ei ei, kumta ka Dorbar Elaka ka kwah ban pynshai kumne “Hadien ba la ïathuh u Daloi ha ka Dorbar Elaka halor katei ka shithi ba u la ïoh na u Waheh Shnong Mynkrem, ka Dorbar Elaka ka la bthah ïa u Daloi ba um dei ban jubab ïa katei ka shithi kaba u Waheh Shnong Mynkrem u la phah shimet sha u Daloi namar ba ka shithi kam shai bha shano u Waheh Shnong Mynkrem u mut ban ai, ha ka shithi u thoh kti sha u Secretary Village Court katba u kyrpad pat ïa ka jingujor sha u Daloi bad ruh kumba u kdew ha ka shithi ba u Daloi bad ki kynhun jong u ki la pynpait ïa ki mawpud ha ka khlaw kaba ki khot “Pohsikhmat” hynrei ki dkhot jong ka Dorbar Elaka ki khlem pynpait ïa ki maw pud ha kata ka khlaw tangba ki pynpait ïa ki mawpud kiba don ha shilynter jong ka Khlaw ka Elaka kaba kyrteng “Lakaweng” kiba la dang shu dep thung tuh shen da mano re mano. Namar ha ka por ba mynshwa ym juh don mawpud ha kita ki bynta. Bad ruh ka Dorbar Elaka ka pynshai ba katei ka Khlaw kam dei ka hok kynti shimet jong u Daloi ne ka Village Court. Nalor bym shai ka jingujor hynrei u Waheh Shnong Mynkrem u dang buh sa ka por kaba lyngkot kata 18/04/2025 kaba tang 5 sngi ban pyndep, kumta ka Dorbar Elaka kam lah ban shim rai ha kita ki por ba khyndiat bad ka dang ap ïa kata ka por ba la buh u Waheh Shnong Mynkrem ba kan kut khnang ba kin wad da kiwei pat ki lynti kumba u la kdew ha ka shithi.
Ha kaba ïadei bad ka shithi 12/04/2026 kaba ki ong ha ka khubor kaba u Daloi um leh ei ei, ha ka jingshisha ka Dorbar Elaka ka la ïoh jingshai na u Daloi ba u khlem ïoh ïa katei ka shithi katkum katei ka tarik ba ki la kdew.
Ha kaba ïadei bad ka shithi 30/06/2026 kaba ki la phah sha u Daloi kaba ki ong ha ka khubor ba u Daloi um leh ei ei, ha ka jingshisha katkum ka jingïathuh u Daloi ha ka Dorbar Elaka ba kane ka shithi ba ai u Waheh Shnong Mynkrem katkum ka phang “Ka jingpan jingtip/report” ka dei shaphang ka Court Case hapdeng ka Hula Mynchong bad Ka Dorbar Shnong Mynkrem, kaba dang don hapoh ka jingbishar jong ka Village Court, Elaka Shangpung kaba u Daloi um don hok ban jubab.
Halor ka jingong u Waheh Shnong Mynkrem ba don kiba shim kabu ban ïoh die ïa ki dieng na katei ka khlaw na ka bynta ban kamai spah jong ki, ka Dorbar Elaka ka don ban ong kumne “Ha ka jingshisha ma u kum u Waheh Shnong lada u tip ba don kum kita ki briew kiba shim kabu u dei ban pyntip sha ka Dorbar Elaka kumba la juh leh da kiwei pat ki Dorbar Shnong ha kiba ka Dorbar Elaka ka don khlaw. Kane ka pyni ba dei u Waheh Shnong Mynkrem hi ba ailad ïa kine ki riew shim kabu ban ot tuh ïa kitei ki dieng na kane ka khlaw jong ka Elaka”.
Ha kaba ïadei bad ka jingong jong u Waheh Shnong Mynkrem ba lada dei ka hok jong u Daloi shimet lane ka Elaka ki dei ban wanmih shakhmat da kaba wanrah ïa ki kot ki sla lada don kiba la ai da ka Dorbar Shnong sha u Daloi ne sha ka Elaka, kumta ka Dorbar Elaka ka kwah ban pynshai kumne “Katkum ki khana pateng ba la ïoh na ki rangbah jong ka Shnong Shangpung bad Elaka Shangpung ki ïathuh ba ka Shnong Mynkrem ka dei tang ka jaka rep ne jaka sah bri jong ki briew kiba na ka Shnong Shangpung ha ki por ba mynshwa, kumta katba dang ïaid ki por ki sngi ki dang bun kiba wan rep wan riang bad wan sah bri ha katei ka jaka kumta hapoh ka jingïalam jong u (L) Long Phyllei ha kata ka por ki la pan bor na ka Dorbar Elaka bad na u Daloi ban seng noh da ka shnong ka thaw kaba ki khot mynta ka shnong “Mynkrem”. Bad kane ka khlaw kam dei ka khlaw shimet jong u Daloi kumba la kynnoh da u Waheh Shnong Mynkrem. Kumta ka Dorbar Elaka ka la rai ruh ban hukum ia u Waheh Shnong Mynkrem ban wan mih shakhmat bad wanrah ïa ki kot ki sla kiba la ai da ka Dorbar Elaka lane mano uta u Dalloi ba la pynshisha ba katei ka Khlaw ka dei ka hok kynti jong ka Dorbar Shnong Mynkrem”.
Sa kawei ka jingpynshai ïa u Waheh Shnong Mynkrem ba mynshwa ha ka por ba ym pat don ka District Council, haba seng shnong seng thaw, ka synshar ka khadar hapoh ka Elaka dei ban peit da u Dalloi bad ka Dorbar Elaka.
Ha kaba ïadei bad jingong jong u Waheh Shnong Mynkrem ba dei tang hadien ba la ïoh ïa ka District Council sa lah ban long trai ïa ka khyndew ka shyiap, ngi kum ka Dorbar Elaka ngi pynrem jur ïa kane ka jingong namar ba hashwa ban mih ka District Council, ki Raij, ki Elaka bad ki riew shimet ruh ki la lah ban kamtrai ïa la ka jong ka jaka ka puta jong ki bad ha ki jingïathuhkhana pateng jong ki Raid bad ki Elaka hapoh ka Ri Jaiñtia baroh kawei ka la don lypa naduh mynshwa, ym dei kumba ong kulmar u Waheh Shnong Mynkrem.
Ka Dorbar Elaka ka sngewkhia ruh halor ka jingkynnoh jong u Waheh Shnong Mynkrem ba u Daloi u maham ïa ki khun ki hajar jong u, kumta ka Dorbar Elaka ka kwah ïa u Waheh Shnong Mynkrem, ba u dei ban pynshisha kiei kita ki khun ki hajar jong u kiba shah maham ha u Daloi khnang ba ka Dorbar Elaka kan tip ban leh ei ei ha kaba ïadei bad kane ka jingmaham jong u Daloi.
Kumta ka Dorbar Elaka ka kwah ban pynshai halor kane ka jingkynnoh ïa u Daloi ba u lehbor halor ka khlaw ba kamtrai jubor ka Dorbar Shnong Mynkrem kumne:- Ka Dorbar Elaka ha ka 28/08/2020 la don ki dieng kiba la shah khyllem ha ka jingjur jong u lyer ha ka khlaw jong ka Elaka kaba don ha Lakaweng bad ha kata ka por ka Dorbar Elaka ka la die ia kitei ki dieng sha u Rolet Iakai na ka Shnong Mynkrem, ym don mano mano ba pyrshah bad ha ka 19/09/2020 ka Dorbar Elaka ka la ïoh jingtip ba u Leaderone Passah, u Rolet Iakai, u Hei Passah bad u Son Langstang kila pom dieng tuh na katei khlaw jong ka Elaka, ka Dorbar Elaka ka la phah hajir bad daiň kuna ïa ki, ha kaba kine kiba pom dieng tuh ruh ki la kubur ba ki la leh bakla sha u pud khlaw jong ka Elaka khlem da pan jingbit bad ki la monjur ruh ban siew ïa ka kuna. Ha kane ka por u Waheh Shnong jong ka Dorbar Shnong Mynkrem u dei u Waheh Nidamon Shulet. Bad ha ki Waheh Shnong Mynkrem ha ki por ba la dep shadien um juh don kano kano ka jingkhang ïa ka Dorbar Elaka ban longtrai ïa katei ka khlaw na ka Dorbar Shnong Mynkrem. Hynrei naduh ba long Waheh Shnong da u Risnainlang Langstang sa mih kane ka jingkulmar halor katei ka khlaw.
Kumta ka Dorbar Elaka ka la pynrem jur ïa kane ka jingkynnoh ba khlem nongrim jong u Waheh Shnong bad u Assistant Waheh Shnong Mynkrem pyrshah ïa u Dalloi. Namar ba kane ka jingkynnoh jong ki, ka thew beit ïa u Dalloi shimet bad ha ka jingshisha hashwa ba kin pynpaw ïa ka jingkynnoh hakhmat ki lad pathai khubor ki dei ban tip trai shwa ka jong no katei ka khlaw, la ka dei jong u Daloi ne jong ka Dorbar Elaka.
Kumta ka Dorbar Elaka ka dawa ruh na u Waheh Shnong Mynkrem bad Assistant Waheh Shnong Mynkrem ban wan panmap mardor na u Daloi, Waheh Chanki Langbang hakhmat jong ka Dorbar Elaka hapoh 3 (Lai) sngi lym kumta ka Dorbar Elaka kan ujor sha ki bor ba halor pyrshah ïa ki jingkynnoh bad jingkamtrai jong ki halor katei ka Khlaw jong ka Elaka. pynkut ka kyrwoh ba la phah na ka ka Dorbar Elaka Shangpung.