Ka Hynniewtrep Intergrated Territorial Organization (HITO) ha ka 9 tarik Ïaiong 2026 ka la leit buh da ka jingthoh sha u Myntri Rangbah ka jylla u Conrad K Sangma ban pyrshah jur ia ka jingthmu ka Sorkar ban ai wai jaka kumba 66 acres sha ka Indian Hotel Company Ltd (IHCL) ha Lumpongdeng na ka bynta ban shna ia ki 5 star Hotel Resorts bad Spa.
Haba kren sha ki lad pathai khubor u President jong ka HITO u bah Donboklang Dkhar u la ong ka Seng ka pyrshah jur ia kane ka jingthmu ka Sorkar ban tei ia ka 5 star Hotel Resort bad Spa ha Lumpongdeng Umiam.
Nalor kata u la ong ka jingdon ki 5 star Hotel kum ka Vivanta bad ka Marroit ruh kam don jingmyntoi ei ei ka wanrah ia ka jingduhnong namar ka pisa ka leit sha ka Assam bad kam kyntiew ia ka ioh ka kot jong ka jylla.
Ka Seng ka ieng ha ka nongrim kaba skhem bad ka pyrshah jur ia kane ka jingthmu ka sorkar bad da lei lei kam ailad halor kane ka jingleh ka sorkar bad ka dei ban pynduh pyndam noh ia kane ka jingthmu ban ai jaka kaba 66 acres sha ka Indian Hotel Company Ltd.