Ki nongshet ja skul hapoh ka shatri “Union Cook Helper Poshan Meghalaya” ha ka 20 tarik Jylliew 2026 ki la pynlong da ka jingrah plakad hakhmat ka Courtyard Marriott hadien ka jingioh jingtip ba ka Myntri ka tnad pla tyngka ka sorkar pdeng ka Nirmala Sitharaman ka don ha katei ka jaka.
Haba kren sha ki lad pathai khubor ka President ka Kynhun ki nongshet ja skul ka Kong Gina Nengnong ka la pyntip bad pynsngew sha ka sorkar ba kan kyntiew noh ia ka bhah na ka sorkar pdeng na ka bynta ki nongshet ja skul.
Nalor kata ka la pynpaw ba kumba ka dei 90 percent na ka Sorkar pdeng bad 10 percent na ka sorkar jylla, ka Sorkar jylla ka la dep pynkiew na ka 100 tyngka sha ka 1100 tyngka bad na ka bhah jong ka Sorkar pdeng ka dang sah beit 900 tyngka mynta la palat 20 snem la ong ka President ka Union Cook Helper Poshan Meghalaya.
Shuh shuh ka la ong ba na ka por sha ka por ka jingkiew ki marbam mardih bad kiwei ki jingdonkam, kim lah ban pyndap shuh ia ka ïing ka sem bad ki nongshet ja skul ki dawa ba dei ban pynkiew noh ia ka bhah na ka Sorkar pdeng na ka 900 tyngka sha ka 9000 hajar tyngka.
Naduh u snem 2022 ka Kynhun ka la phah ia ka jingthoh bad haduh mynta kim ioh ia ka jubab hynrei hadien ka jingwan ka Myntri ka tnad pla tyngka sha ka jylla kumta ki nongshet ja skul ki pynsngew sha ka Myntri ba kan ioh sngew bad pynsngew ha ka ïingdorbar ba kan kyntiew noh ia ka bhah ki nongshet ja skul na ka 900 tyngka sha ka 9000 hajar tyngka.
