Ka Meghalaya State Skill Development Society (MSSDS) ka la sdang ia ka Phase 2 recruitment mynta ka sngi ha ITI Campus, Khliehriat, na ka bynta ka Wapung C& RD Block.
La don katto katne ki counter na ka bynta ki samla kiba wad jingiarap kiba iadei bad ka jingpynrung kam, ka jaka ai jingtip, ka jaka ai jingmut, bad ka jaka pynrung kyrteng.
La pynlong ia ka prokram kaba lyngkot shwa ban sdang ia ka jingpynrung kam. Ha kane ka sngi la iadon lang u Deputy Commissioner ka East Jaiñtia Hills District u Manish Kumar, IAS; u bah Boimi Dkhar uba dei u ophisar pynroi ia ki sap ki phong (Skill Development Officer) na East Jaintia Hills District; ki nongtrei jong ka MSSDS bad kiwei kiwei.
Haba ai jingkren ha kane ka prokram, u Deputy Commissioner u Manish Kumar u la ong ban ïoh ïa ka ïoh ka kot kaba $10 billion dollars ha ki snem ban wan ka donkam ban pyndonkam ïa ka sap jong ki samla. U la bynrap ba ym don ka imlang sahlang kaba lah ban kiew haba ki samla jong ka ki sah khlem jingpyndonkam bad u la khot ia katei ka jingpyniaid kum ka kabu kaba khraw khamtam eh na ka bynta kiba la sangeh ka jingleit skul bad kiba dang don ka jingwad kam wad jam. U la pynpaw ka jingkyrmen ba kane ka jingthmu kan long ka jingjop bad u la ai khublei ïa baroh ki samla pule kiba la wan ban ïashim bynta.
U Boimi Dkhar u la iathuh ha ki lad pathai khubor ba ha Phase 1 la iohi ia ka jingwan thep kam kaba khlaiñ bha na ki samla pule. Ka Phase 2 ka ai bun kiwei pat ki bynta treikam: palat 10,000 tylli ki kam bad 6,000 ngut ki nongpynrung kam ki iashim bynta. U la ong ba ka ophis ka la trei ban wanrah ia ki nongpynrung kam kiba bun jait khnang ba ki samla kin kham suk ban ioh ia ki kam kiba biang, kynthup ia ki katto katne ki kam kiba sha bar ri.
Ha kane ka Phase 2 ki kam kiba kongsan eh na ka bynta ki samla ki dei ha ki kam Beautician, Hospitality bad Construction kine ki dei ki bynta kiba bun ba ki samla na East Jaiñtia Hills ki ia wad, u la kyrmen ba ki nongwad kam kiba thrang shisha ban ioh kam kin wan shuh shuh. Lada ki samla pule kim lah ban wan mynta ka sngi, ka MSSDS kan bteng lashai ka sngi bad ha ka 21 tarik ha ki ar tylli kiwei pat ki jaka kata ha shnong Latyrke bad ha Lumshnong.
Ki samla pule kiba pyndap ia ka phorm lyngba u QR code ki donkam tang ban ai ia ka kyrteng jong ki ha ka jaka pynlong ia ka Recruitment Drive. Kito ki bym pat pyndap ia ka online form ki lah ban pynrung kyrteng ha katei ka jingialang.
