Ka Jaintia Student Movement (JSM ) ha ka 6 tarik Jymmang 2026 ka la wan ban kynduh ia u Commissioner & Secretary ka tnad pule puthi u Vijay Kumar Mantri na ka bynta ban iakren haba iadei bad ka jingpynslem ka sorkar ban buh ia ka jaka thoh Exam CUET ha Jowai.
Haba kren sha ki lad pathai khubor u Education Secretary ka JSM Central Body u Bah Heihokmi Supuh u la ong ka Seng na ka por sha ka por ka la pynsngew ia kane ka mat naduh ki snem 2024 bad la phah ruh lyngba ka jingthoh sha u DC ka West Jaintia Hills, sha ka tnad pule puthi bad kumjuh ruh sha u Myntri ka tnad pule puthi ka sorkar jylla hynrei ka sorkar ka shu sngap jar jar.
Nalor kata u la ong ka Seng kam pyrshah ia ka CUET hynrei donkam ia ka Sorkar ban buh ia ka CUET Exam Centre ha Jaintia namar 95 percent ki khynnah pule na Jaintia ki dei kiba wan na ka longïing baduk. U la ong tang ban thoh ia kane ka exam CUET sha shillong, Tura, Assam ka lah ktah shisha ia ki khynnah pule khamtam ia kiba dei na Jaintia bad lada ka exam ka sdang ha ka por 9 baje kat ban mih na Jaintia kane ka ktah shisha ia ki khynnah pule kiba thoh ia ka CUET, kumta ka JSM ka dawa na ka Sorkar ba ka dei ban buh ia jaka thoh (Centre) CUET ha Jowai, khnang ba kan pynsuk ia ki khynnah pule ka thain Jaintia.
Khatduh u la ong ka Seng nangne shakhmat kam phah shuh da ki jingthoh lane ki jingiakynduh hynrei kan sa shim da ki sienjam kiba tyngeh namar ka jingshim sting ka sorkar namar katkum ka jingthoh ba la ai da ka sorkar ka la pynpaw ba ka don ka jaka thoh exam CUET tang ha Jowai Polytechnic hynrei ha ka Website bad admission kam don kata ka jingthoh ba don ka exam centre ha Jowai Polytechnic.