Mynta ka sngi ha ka por mynstep hashwa ban pynlong ïa ka Public Hearing jong ka Shree Cement ha Lum Syrman, East Jaintia Hills, kala don ka jingshah kawang maw kaba jur bha da ki briew kiba la pyndonkam da ka Shree Cement ban khang lad ïa kiba wan pynsngew ïa ki jingpyrshah sha katei ka Public Hearing.
Ka jingshah kawang maw kala wanrah ia ka jingjulor jong ki kali mator jong ki dkhot sengbhalang bapher bapher haduh bala pait ki it kali.
Ban khang lad ïa kiba leit sha ka Public Hearing la tih pynjulor ïa u surok haduh ba ki kali kim lait shuh ban jam sha shilliang.
Wat ïa ka Ambulance jong ka Jaiñtia Students Union (JSU) kala shah pynjulor haka por kumba 11:30 mynmiet bad pynmynsaw ïa kiba don hapoh kali katba dang leit kit briew nongpang na iew Cement sha Shnongrim
Ha ka kyrwoh ba phah da ki nongialam ka JSU sha ki lad pathai khubor hadien ba ki nongialam ka JNC naduh u President, General Secretary bad Publicity Secretary ki shah kem ha ka lynti ban leit sha jaka public hearing ki iaid da kata ka lynti kaba jai jai hynrei ka sorkar ka thom da ka bor, kane ka pyni ba ka sorkar ka synshar bad leh donbor.
Na ka liang ka JSU, kala pynrem jur ia ka jingleh riew khlaw kane ka sorkar ba mynta, “Kumno phin pynneh ia ka shong suk shong saiñ haba phi sdang na lade ban thombor ia u paitbah da ka ba siat Tear Gas bad phi pynkheiñ ruh ia ka aiñ ba phi tih ia ki thliew ban khang ia u surok paitbah kane ka paw shai ba kam dei ka public hearing ka dei ka private hearing jong ka sorkar MDA 2” ong ki nongialam seng.
