Ka Tep Kyndait Government U.P. School, Tuber Kmaichnong mynta ka 31.07.2026 ka la pynkut ia ka Training Self Defense Training for Girls kaba la mang da sorkar lyngba ka ophis treikam jong ka District Mission Co-ordinator Samakra Shiksha, East Jaiñtia Hills District ha ka kyrteng jong ka Scheme Rani Lakshmi Bai Atma Raksha Pratiksha.
Kane ka training kaba la sdang naduh u bnai April 2026 kaba la buh ban pynkut ha u bnai June tang na ka bynta lai bnai, la bteng ia ka, na ki daw ba bun ki shuti ha kine ki sngi ba lah dep, la iathuh kawei na ki nonghikai, Miss Eitilang Siangshai, MA. B.Ed.
Ha shuwa ban sam ia ki certificate sha ki khynnah skul ba iashimbynta, la ioh ka jingkren lyngkot na u Headmaster jong ka skul, Sir Riquoma Rq. Laloo; uba la ong ba, ki khynnah ki ioh shibun ki jingmyntoi na kane ka training. U la kyntu jur ia ka Sorkar ba kan ailad shuh shuh na ki por sha ki por kum kine ki training, kiba iarap shibun ia ki khun kynthei ka Ri ban iada ialade na ki jingeh ba bunjait. U la pynpaw ka jingsngew nguh ia ka West Jaiñtia Karate-Do Association, Jowai, kaba la wan ban ai jinghikai, da kaba aiti ha u Sir Ribait oo Pde, Black Belt, kum u Instructor jong ka Training bad ha kajuh kapor u da shimkhia bha ia ka kam.
Ka jingai jingiarap ka ophis DMC, ka long kaei kaei kaba pynkmen ia ka skul hi baroh kawei, ymtang ia kito kiba ioh jinghikai wat ki Nonghikai ruh. U Headmaster u la buh ka jingkyntu ia ki students ba ki dei ban pyntreikam ia kine ki jingtip ba ki la ioh. “Practice man la ka step ha iing, kilan ia ka met ka phad jongphi, ka long kawei na ki dawai ban pynkoit pynkhiuah iaphi. Lada phi shu ieh sah ia kane ka jingtip, kan long lehnohei kane ka jingiarap ka Sorkar iaphi.” u la ong shuh shuh.
La ioh ia ki kyntien ai khublei na iwei na ki Nonghikai Miss Waphasan Bareh, MA. M.Ed.
