Ka Jowai Diocese Catholic Youth Movement (JDCYM), ha ryngkat ka jingïatreilang bad ka Kyrmen Foundation daka jingkyrshan lang ka Federal Bank Jowai Branch bad ka Jowai Civil Hospital Blood Bank, ha kane ka sngi saitjaiñ 2 tarik Jymmang, 2026 kila pynlong ïa ka jingsynñiang snam ei ne ka ‘Voluntary Blood Donation Camp’ ha Tome Memorial Higher Secondary School, Mooralong, Jowai.
La pynïaid ïa ka jingïalang da u Wellson Siangshai, President ka JDCYM bad la sdang da ka jingduwai na ka Sr. Wansuk Kyndait, DYLA JDCYM, pynbud pat sa ka jingpdiang sngewbha na ka Aiti Mary Mawlong, na ka Staff Kyrmen Foundation.
La wan sakhi lang ha kane ka sngi da u ma Kyrmen Shylla uba dei MLA ka Khliehriat kum u Kongsan bad u A. Andrew Shullai, MDC Jowai North kum u Symbud Kongsan. Kiwei pat kiba la wan sakhi lang ki kynthup ïa u Senior Branch Manager ka Federal Bank, Jowai Branch Bah Sourav Nandi, u Dr. M. Ryngkhlem, Medical & Health Officer Civil Hospital Jowai, u Rahnam B. Jyrwa- Assistant Director -Quality Manager MSBTC, Shillong, ka Sr. Teresa Paite- Principal Skul, lem bad kiwei de kiba la shah khot sngewbha.
Ha kane ka sngi, kila don haduh 27 ngut ki samla kiba la register ban ai snam, hynrei tang 15 ngut kiba la lah ban ai snam.
La pynkut ïa ka prokram da ki kyntien ai khublei da ka Rilin Mary Shadap, kaba la pynpaw ïa ka jingsngewnguh sha baroh ki nong synñiang (donors), ki nongpynïaid, ki nongkyrshan bad ki nongshah khot sngewbha kiba la pynlong ïa ka prokram kaba jop.