U Myntri Rangbah ka jylla u Conrad K. Sangma u la pynbna ba ka sorkar Meghalaya ka la thaw ia ka komiti ban ai jingmut ban pynkylla ia ki kyndon tih dewiong, kaba thmu ban iarap ia ki nongtih dewiong kiba rit bad ki trai jaka ha ka jylla.
Ka rai ban thaw ia kane ka panel ka long hadien ka jingialang hapdeng u Myntri Rangbah ka jylla bad ka tnad dewiong jong ka sorkar pdeng.
U Myntri Rangbah u la kyrpad ban pyllait ia ka kyndon ba la buh mynta kaba bthah ia ka jaka kaba duna eh 100 hectare na ka bynta ki kam tih dewiong.
Haba batai ia ka jingdonkam jong kane ka sienjam, u Conrad K Sangma u la pynpaw ba donkam ia ki jingkylla ha ka polisi kiba kongsan khnang ban pynlah ia ki nongtih dewiong kiba rit bad ki trai jaka ban sdang ia ka jingtih dewiong katkum ka ain da kaba pyndonkam ia ki buit stad saian kiba mynta. U la kdew ba ka jinglong mynta kaba donkam ia ka jaka kaba heh 100 hektar ka pynlong ia ka ban long kaba eh ia kiba bun ki nongtih mawshun trai ri trai muluk ha ka jylla ban pan laisen tih mawshun.
Katkum ka jingong u myntri rangbah ka jylla, u myntri dewiong ka sorkar pdeng u la jubab bha ia kane ka jingtyrwa bad kyrpad ia ka sorkar jylla ban thaw ia ka komiti ba kyrpang ban ia kren ia kane ka kam.
U myntri rangbah u la pynthikna ba la dep ban thaw ia ka komiti jong ka jylla. Ki dkhot jong ka ki kynthup ia u Additional Chief Secretary, u Principal Secretary, u Advocate General, bad u Director jong ka tnad tih mawshun jong ka jylla.
La dep ban iaid shaphrang, ha kaba ka komiti ka la pynlong ia ka jingialang kaba nyngkong, ryngkat bad ar tylli ki jingialang jong ka kynhun ba tbit ba la pyniaid da u Additional Secretary. Ka jingialang kaba ar jong ka komiti kaba pura la buh ban long ha ki taiew ban wan.
Haba pynpaw ïa ka jingkyrmen halor kane ka jingthmu, u Myntri Rangbah u la ban jur ba ka sorkar ka kyrmen ban shem ïa ka lad kaba lah ban leh ka ban ailad ïa ki trai par dewïong rit ha ka thaiñ ban pynïaid ïa ki par dewiong jong ki da kaba suk bad da kaba kohnguh pura ïa ka aiñ, da kaba batai ïa kane kum ka sienjam kaba kongsan bha na ka bynta ka jylla.