Ki Nongtrei jong ka koit ka khiah, Ladthadlaboh Urban PHC (Health Welness Centre) hapoh ka jingialam jong u Dr.D.Nongpluh, ki la pynlong ia ka Special Outreach Camp jong ki ia ki Nongshong shnong jong ka Mookyrdup Jowai hynne ka sngi August 14.2026, ha Iingdorbar Hall jong ka Mookyrdup bad kumba sawphewngut eiei ki nongshong shnong ha ki jingpang bapher bapher ki la ioh jingsumar na u Dr. D.Nongpluh bad ka kynhun jong u, kiba kynthup ia ka kong Suteki Siangbood, kong Kyrmen, kong Jane, kong Rebecca bad ka kong Hilda Gympad.
Kumba ka Sorkar ka angnud ban rat diengkhong ia ka jingpang Tuberculosis (T.B) kane ka kynhun ka la rah ruh ia ki kor ki bor X-ray na ka bynta ban jurip bniah (Checkup) ia ka jingpang TB. Ki Rangbah bad ki Longkmie wat lada kim sngew halade ba don kane ka jingpang TB ha ka met ka phat jong ki, pynban ki wan shah X-ray ban pynthikna ialade ban tip la ki don ne kim don kane ka jingpang T.B, bad ia ka result yn sa pynioh kham hadien.
Na ka liang ki Nongshong shnong lyngba kane ka kynhun Nongtrei ka Urban Health Wellness Centre Ladthadlaboh Jowai, ki la pynpaw ka jingsngewnguh ia ka Sorkar Jylla bad ia ki nongtrei jong kane ka Urban Health Wellness Centre kiba la kloi ban wan sha ka shnong jong ki bad ai ka jingsumar ei ia baroh kito kiba wan phah check ialade.
Ha ka juh ka por ki pynpaw ka jingsngewnguh kaba kyrpang ia u Dr. D. Nongpluh uba la check bad Examin bha ia uwei pa kawei ki Nongphah check ha kane ka sngi bad kum juh ia ka kynhun jong u (Nurses and Helpers) kiba pyni da ki kam ban kyrshan ia ki tymmen ki kro da kaba shan ba sdhuh ha ka lynti iaid jong ki la sha u Doktor ne shim dawai.
Ha ka jingshisha ha kaba kum kane ka “Special Ourtreach Camp” bun ki Samla pule, ki khynnah skul kiba kwah ban wan phah check ialade, pynban kim iohlad naba ka dei ka sngi longklass, longskul ki khynnah bad na ka liang ki nongshong shnong, u ma M.M.Thaiang uba long u Symbud Waheh Chnong u la ai jingmut ba haba ka tnat ba dei peit ia ka koit ka khiah ki wan pynlong ia kum kane ka Special Outreach Camp ki la dei ban pynlong ha ka sngi Saitjaiñ ban iohlad ki khun samla pule bad ki khynnah skul jong ka shnong ban wan phah check ialade.
Ha kane ka sngi la don ruh ka jingai Syrnot ia ki katto katne ngut ki longkmie jong ka shnong da ka Urban Health Wellness Centre Ladthadlaboh, Jowai.
