Ka Party National People Party (NPP) ha ka jingialang paidbah jong ka kaba la long hynne ha Iew Khanduli ha kaba da ki hajar ngut ki paidbah napoh ka 1 Nartiang Assembly Constituency bad nabar ki la iatuid sha kane ka jingialang paibah kaba heh jong ka party NPP.
Ha kane ka jingialang nalor u ma Sniawbhalang Dhar, u MLA ka thaiñ uba long ruh u Symbud Myntri Rangbah ka Jylla Meghalaya, la ioh ruh ia kajingkren na u bah Compromise Nongrum State Youth President ka NPP, bah Banjop Pyngrope MDC, Khasi Hills Autonomous District Council, ma Thombor Shiwat MDC uba long ruh u Chief Executive Member ka Jaintia Hills Autonomous District Council. Ha kane ka jingialang la ia don lang u ma Pheinlang Nanglein Ex.MDC, ma Aiborlang Shadap MDC JHADC, ma Evening Teron MDC, ma Jesse Suiam MDC, ki riewkhmat jong ka Party NPP napoh ka 1-Nartiang Assembly Constituency bad kiwei de ki riewkhmat bad ki Nongkitkam shnong na ki shnong ba marjan jong ka thaiñ Khanduli.
U ma Sniawbhalang Dhar haba kren ha kane ka sngi u pynpaw ka jingsngewnguh ia baroh ki nongshong shnong jong ka 1-Nartiang Assembly Constituency ba ki la pynjop biang ia u kum u MLA jong ki ha kane ka kynti bad kumba ki la kyrshan ia u ha kine ki 4 term kiba la dep, u kyntu ruh ia ki paidbah ba kin sngewbha ban kyrshan ia ka Dr. Mazel Ampareen Lyngdoh ka Kyrtong MP jong ka National People Party ba kan ioh ia ka jingjop. Nangta u ma Sniawbhalang u ong ba na ki 36 tylli ki Assembly Constituency kiba hap hapoh ka 1-Shillong Parliamentary Constituency ka la ioh ia ka jingkyrshan bad ka jingkyrshan naki paidbah nongthep vote jong ka 1-Nartiang Assembly Constituency kan nangpynjop donburom shuh shuh ia ka Dr.Mazel Ampareen Lyngdoh.
Shuh shuh u ma Sniawbhalang Dhar u ong ha kane ka Sorkar MDA-2 la lamkhmat ia ka sorkar da ka Party NPP, ha Iingdorbar Raja Sabha ka sorkar ka don u Dr.W.R Kharlukhi uba dei na ka party NPP bad lada ki paidbah kin ai ka jingkyrshan ia ka Dr.Mazel Ampareen Lyngdoh kan nangsuk shuh shuh ia ka Sorkar Meghalaya ba kan ioh ia ki Scheme pynroi ri ki bapher bapher na ka bynta ka jylla ki ban kyntiew ia ka roi ka par bad rah ia ka burom ka ijot jong ka jaitbynriew kaba shim jait na ka kmie, ka jingdawa ban pynrung iaka ktien Khasi ha ka khyrnit kaba phra jong ka Riti synshar jong ka ri bad ka jingdawa jong ka Jylla ia baroh ki jaka kiba dangdei hok jong ka Ri Khasi bad Jaintia ba ki dei ban wan hapoh u pud u sam jong ka Ri Khasi Jaintia.
Baroh ki Nongkren ki kyntu jur ia ki paidbah nongthep vote ban iamih paidbah ha ka 19 tarik mynta u bnai bad ban shon ia ka Muhor jong ki ha ka dur jong ka KOT ba ka Kyrtong jong ka NPP (Dr.Mazel Ampareen Lyngdoh) kan ioh ia ka jingjop kaba don burom bad ha ka juh ka por ki kyntu wat ia kito ki lok ki bym ju kyrshan ia ka NPP ha kine ki snem kiba la leit ruh dang don ka por bad wan ban kyrshan ia ka Kyrtong jong ka NPP, ka Dr.Mazel Ampareen Lyngdoh ba kan ioh ia ka jingjop kaba donburom bad ban rah ia ka burom jong ka jaitbynriew kaba shim Jait na ka kmie ha khmat ka Ri India bad ha ka pyrthei hi baroh kawei. Ia ka jingialang la pyniaid da u ma Hamkom Khyriam.
