Ki bor pyniaid jong Seiñ Raij Tuber Tuber lynba u Waheh Shong ka Shnong Tuberkmaishnong ha East Jaiñtia Hills District u bah Jiedlang Sana u la ai jingkren ha ki lad khubor ha ka jingiadei bad ka jing pynkhreh ia ka lehniam Behdeiñkhlam ka Seiñ Raij Tuber kaba ju pynlong man la u snem.
U bah Jiedlang Sana u la ong ba ia kane ka Behdeiñkhlam ka Seiñ Raij Tuber la ju pynlong naduh ki por myn hyndai ha kane ka jaka kaba la tip kum ka “Biar Blai Aitnar,” ha kaba ki briew ha ka histori ki ju shna ia ki tiar nar bad shibun ki tiar nar ki mih na kane ka jaka, ula kyntu ia ki paidbah ba kin sngewbha ban ia poi ha kane ka Behdeiñkhlam ka Sein Raij Tuber ka ban sdang naduh ka 14 tarik mynta u bnai haduh ka 17 tarik mynta u bnai Naitung 2026.
Ha kane ka sngi lehkmen, u kongsan un long u Myntri Rangbah ka jylla Meghalaya, u Shri Conrad K. Sangma, bad yn synran da u Symbud Myntri Rangbah ka jylla u bah Sniawbhalang Dhar, ki MDC, u MLA ka thaiñ, ki ophisar bad kiwei kiwei de ki heh sorkar baroh. U la kyrpad ia ki nongwan peitkai ban pynneh ia ka jinglong ryntih khnang ba kane ka tamasa kan long kaba jop bad kaba sah jingkynmaw ha ki por ban wan.
U ma Sana u la ong ba kumba 65–70 tylli ki jingshad “Rong bad Rot” yn pyni da ki khun ka Sein Raij Shnong kiba don sap na palat 30 tylli ki shnong Sein Raij.
Ha ka jingiadei bad ka leit ka wan, ki VIP bad ki jaka ieng kali paidbah kin don ha ki jaka ba la buh kyrpang. Ki don lai tylli ki jaka ki ban pyniasoh bad ka surok bah, u la kyrpad ia ki paidbah ban burom ia ka rukom pyniaid kali.
Haba pynpaw ia ka jingeh ba ki khun ka Seiñ Raij Tuber u la kdew ba ka jingkhang tih dewiong ha ka Distrik ka wanrah ia ka jingeh ha ka liang ka pisa ha kaba bun ki longïing kiba la shah ktah naduh ba khang ia u dewiong. U la ong ba ka Behdeiñkhlam ka dang ïai bteng ban rakhe wat hapdeng ka jingkhang khyrdep lane ha kito ki por (Lockdown); wat lada ka jingeh ha ka liang ka pisa tyngka, ka tamasa ka dang iaid beit iaid ryntih man la u snem namar kane ka long kum shi bynta jong ka niam tynrai u la ong. U la kyntu ruh ia ka sorkar ban weng noh ia ka jingkhang tih dewiong khnang ba ki khynnah samla kin ioh ia ka lad ban pule kaba kham bha ha ki por ki ban sa wan.
