Ka Moodymmai SU bad ka Chutwakhu SC kila long ki nongjop ha ka jingïalehkai jong ka District Cricket League-2026 kaba la long mynta ka sngi 21 tarik u Lber 2026, bala pynïaid da ka West Jaiñtia Hills District Cricket Association ba la pynlong haki ar tylli ki jaka.
Ha ka jingïalehkai kaba long ha madan Khliehtyrchi Mini Stadium, ka Moodymmai SU kala jop da 58 run ïa ka Ummulong B.
Hadien ba jop ïa ka toss, ka Moodymmai SU ka la jied ban tied nyngkong bad ka la kamai 194 run bad hap 9 wicket ha ki 30 over. U Pyndap Lamin ula long uba kamai bun run da kaba tied 52 run na ki 48 bol, katba u Daowan Passah ula synran lang da 36 run na ki 21 bol. Na ka liang ki nongkawang bol jong ka Ummulong-B, u Kermiki Bamon ula khur 3 wicket na ki 5 over.
Haba wan beh ïa ka thong, ka Ummulong B kam shym la lah hynrei kala kamai tang 136 run ha ki 25.2 over bad hap lut baroh ki wicket. U Kermiki Bamon u la long uba kamai bun run da 42 run, katba u Nehheimaya Gatphoh u la kamai 26 run. Na ka liang nongkawang bol jong ka Moodymmai SU, u Rijest Lytan ula khur 3 wicket na ki 6 over.
Ïa ka nam Man of the Match la ïoh da u Daowan Passah (Moodymmai SU).
Ha ka jingïalehkai kaba long ha madan Wahiajer Mini Stadium, ka Chutwakhu SC ka la jop da 6 wicket ïa ka Riwar Titan CC.
Ka Riwar Titan CC ka la tied nyngkong bad kamai tang 79 run ha ki 16.5 over bad hap lut baroh ki wicket. U Daman I Pohktai u la kamai 17 run, katba u Ronaldo Khonglah u la kamai 14 run. Na ka liang nongkawang bol jong ka Chutwakhu SC, u Heisa Bareh u la khur 4 wicket bad u Micheal Nongpluh u la khur 3 wicket.
Haba beh ïa ka thong, ka Chutwakhu SC ka la jop suk da kaba kamai 80 run na ki 15 over bad hap tang 4 wicket. U Sam Nesta Chyrmang u la kamai 27 run not out, katba u Ricky Chullai u la kamai 17 run not out. Na ka liang ki nongkawang bol jong ka Riwar Titan CC, u Lestarket Kassar u la khur 2 wicket.
Ïa ka nam Man of the Match la ïoh da u Heisa Bareh (Chutwakhu SC).
Kine ki jingïalehkai ki dei kiba khatduh na ka bynta kine ar kynhun ha ka Pool-D bad Pool-A.
Ha ka Pool-D: Ka Moodymmai SU bad Ummulong B ki la jop mar shi sien bad rem lai sien bad ki ïoh mar 2 point; ka Ummulong-B ka la wan ba 4, katba ka Moodymmai SU kala wan ba khatduh namar ka NRR kaba duna.
Ha ka Pool-A: Ka Chutwakhu SC ka la wan ba 3 da kaba ïoh 3 point (jop 1, jingïasam point 1, rem 2). Ka Riwar Titan CC ka la wan ba 4 da kaba ïoh 2 point (jop 1, rem 3 sien)
La pyntip ki jingïalehkai ha ka sngi Monday, ka 23 tarik u Lber 2026 kin long hapdeng ka Goodwill Mupliang pyrshah ïa ka PCC Phramer ha Khliehtyrchi Mini Stadium, katba ka Dulong CC pyrshah ïa ka Mowkaiaw CYC ha Wahiajer Mini Stadium haka por 9 baje mynstep.
