Ka kynhun ïalehkai Cricket jong ka West Jaiñtia Police kala long ka nongjop katba ka Lion Y&SA bad Young Lads CC kila ïasam mar shi point ha ka jingïalehkai jong ka District Cricket League-2026 kaba la long mynta ka sngi 24 tarik u Lber 2026, bala pynïaid da ka West Jaiñtia Hills District Cricket Association.
Haba phai sha ka jingïalehkai kaba long ha madan Khliehtyrchi Mini Stadium, ka West Jaiñtia Police ka la jop da 195 run pyrshah ïa ka Evergreen Mukhla Mission.
Ka Evergreen Mukhla Mission ka la jop ha ka jingkynting pisa bad kala jied ban kawang bol nyngkong. Ka West Jaiñtia Police haba tied nyngkong ka la kamai haduh 308 run na ki 35 over bad hap 7 wicket. U Devention Lyngdoh u la long u nongtied uba kynsai tam da kaba kamai 107 run na ki 105 bol, katba u Kenny Wann u la kyrshan da kaba kamai 47 run na ki 29 bol. Na ka liang ki nongkawang bol jong ka Evergreen Mukhla Mission, u Daphrin Suna ula ïoh ban pynhap 3 wicket na ki 3 over.
Haba beh ïa ka thong, ka Evergreen Mukhla Mission ka la lah ban kamai tang 113 run na ki 25.3 over bad hap 9 wicket, kaba mut ba ka la duna haduh 196 run ban kynjoh ïa ka thong. U Constancy Syngkon u la long u nongtied uba kamai bun eh da 28* run na ki 31 bol. Na ka liang ka West Jaiñtia Police, u Bishal M Sangma ula pynhap 3 wicket na ki 3 over, katba u Kenny Wann u la ïoh 2 wicket na ki 4.2 over.
Ïa ka khusnam Man of the Match la ïoh rah da u Devention Lyngdoh jong ka West Jaiñtia Police
Da kane ka jingjop, ka West Jaiñtia Police ka la rung sha ka Quarter Final kum ka team kaba wan ba ar ha Pool-C, da kaba jop ar sien, ïasam point shisien (na ka daw jong u slap), bad rem shisien bad ïoh 5 point. Katba ka Evergreen Mukhla Mission ka la wan ba khatduh ha Pool-C hadien ba ka la rem baroh saw tylli ki jingïalehke bad ïoh 0 point.
Iasam point hapdeng ka Lion Y&SA bad ka Young Lads CC
Katba ha kawei pat ka jingïalehkai ha Wahiajer Mini Stadium, la hap ban ïasam mar shi point hapdeng ka Lion Y&SA bad ka Young Lads CC namar ba hap u slap.
Ka Lion Y&SA kaba la tied nyngkong ka la kamai 199 run na ki 34.4 over bad hap lut baroh ki wicket. U Deibormi Rngad (C) u la kamai 47 run na ki 36 bol, katba u Dr. Dawanroy Nongpluh u la kyrshan da 46 run na ki 59 bol. Na ka liang ka Young Lads CC, u Namewanki Pakyntein bad u Meroily Lytan ki la pynhap mar 4 wicket.
Hashwa ban sdang ka inning kaba ar, u slap uba jur u la wan bad neh slem, kumta hadien ba ki Umpire bad ki Captain ki la peit bniah ïa ka madan, la rai ban pyndam noh ïa ka jingïalehkai namar ba dap um ka madan. Kumta la ïasam mar shi point hapdeng ki ar tylli ki team.
Da kane, ka Lion Y&SA bad ka Young Lads CC ki la ïoh rung sha ka Quarter Final na Pool-D, da kaba jop mar lai tylli ki jingïalehkai bad ïasam point shisien bad ïoh mar 7 point. Ka Lion Y&SA ka la wan nyngkong ha ka Pool-D da kaba tam ha ka NRR, katba ka Young Lads CC ka la wan ba ar.
Ka jingïalehkai Quarter Final kaba nyngkong kan long haka 26 tarik hapdeng ka Goodwill Mupliang SC pyrshah ïa ka Young Lads CC ha Khliehtyrchi Mini Stadium ha ka por 9 baje mynstep.