Hadien ba la dep phah ka dorkhas sha u Lat ka jylla, u Shri C H Vijayashankar da ka kynhun jong ka Synjuk Ki Nongsynshar Shnong: Ka Bri U Hynñiewtrep (SNSBH) bad ka Synjuk Ki Rangbah Kur: Ka Bri U Hynñiewtrep (SRKBH) la pynbud ruh ban ai sha ka sorkar jylla katkum ba la ai jingmut u Lat. Ka dorkhas ka dei ka jingujor ia ka Dorbar Thawaiñ Dalariti Rilum Khasi (KHADC) halor ka ba thmu ban weng ia ka kyndon ba hynriew jong ka aiñrew KHADC (Land Administration) Amendment Bill, 2026, ka ba thmu ban taijlih.
Katkum ka Khyrnit Bahynriew jong ka Riti Synshar ka Ri India ka Dorbar Thawaiñ Dalariti ka dei ban iada bad pynneh ia ki riti tynrai, hynrei ka la leh pyrshah pynban da ka ba pyrshang ban sloit ia ka iktiar jong ki Dorbar Shnong, Dorbar Raij bad Dorbar Hima. La aiti ia ka dorkhas sha baroh arngut ki khlieh sorkar, u Conrad K. SangmaMyntri Rangbah bad Prestone Tynsong, Symbud Myntri Rangbah ba dei khmih ia ki kam jong ki Dorbar Thawaiñ Dalariti.
Shwa ban aiti ia ka dorkhas sha ki arngut ki khliehduh jong ka sorkar jylla, u Bah R L Blah, Saiñpyniar ka SNSBH bad Sangot ka SKRKBH u la pule sani ia ka dorkhas bad kyntu ia ki ba kin aijingmut ia u Lat ban kiar na ka ban soi ia ka aiñrew bad ban pynphai mardor. U Bah Prestone Tynsong u la pykynmaw ba ka aiñ ka dei ka ba u la donkti ban pynkhreh sani ryngkat ki khlieh nongsynshar bad kiwei kiwei ki iktiar ba dei khmih ba la dei ban pule bniah shuh shuh, khnang ban ym dkoh ki kyndon aiñ.
U rangbah nongsaid aiñ ba mihkhmat ia ka Synjuk Ki Rangbahkur, u Bah Robert June Kharjahrin u la ban shuh shuh ba ka aiñ ka dei ka ba la iasyllok lang bad baroh ki khlieh nongsynshar bad ba la ia bishar bniah ryngkat bad u Bah Prestone kum u Symbud Myntri Rangbah ba khmih ia ki Dorbar Dalariti ha ka sorkar jylla. U Bah Kharjahrin u la iathuh ba ka la shimpor palat arsnem shwa ban pynlong aiñ bad ban kubur da u Lat ka jylla.
Baroh arliang ka sorkar jylla bad ka kynhun ki rangbah na ki shnong bad ki kur ki la sngew lyngngoh ba tang shikylla miet ka Dorbar Longsan jong ka Dorbar Thawaiñ Dalariti ka la rai ban weng ia ki kyndon ki ba thmu ban sloit ia ka iktiar jong ki Dorbar Shnong, Dorbar Raij bad Dorbar Hima khlem da kynjoh ktien iano iano bad la shu iuhroit naphang ban shimti ia ka bor tang ha lade.
Ka kynhun ki Rangbah Shnong bad Rangbah Kur ka ieng skhem ha ka nongrim ba dei ban iada bad pynneh ia ka iktiar jong ki Dorbar Shnong, Dorbar Raij bad Dorbar Hima katkum ba la seng nongrim ki longshwa manshwa bad ba la kubur da ka Riti Synshar ka Ri India. Ki la kyntu jur ia ka sorkar ba kano kano ka iktiar jong ka Dorbar Thawaiñ Dalariti ka don ia ka jingkitkhlieh ban iada bad pynneh pynsah ia ki riti dustur tynrai, bad da lei lei ym lah ban leh khongpong ka ban long pyrshah ia ka jingthmu jong ka Khyrnit Bahynriew.
