Ka ophis jong u Chief Electoral Officer (CEO) ka Meghalaya u la pynlong da ka jingiakop ‘Juggle the Football’ competition lane ka iakop kynting ball ha Chutwakhu ka shnong kaba la dap 100 snem ha sor Jowai ha kane ka sngi ba ar (9.4.2024).
Kane ka jingiakop ka long shi bynta na ka jingai jinghikai bad ban pynshlur ia ki samla ban wan sha khmat ban ia shim bynta shongshit ban thep ia ka vote jong ki ha kane ka election Lok Sabha ka ban long shen ha ka 19 tarik une u bnai.
U Dr. BDR Tiwari uba dei u CEO ka jylla u la ong ba kum ki samla ki ba ieid ia ki jingialehkai khamtam ha ka football la shim ia ki shi bynta ha kaba iadei bad ka jingiathep vote.
“Ban iadon bynta bad ki samla ka long kaba sngewtynnad”, la ong u Risly Passah uba dei u Chairman jong ka Chutwakhu Sports Club uba la ai khublei ruh ia u CEO ba la jied ia ka Chutwakhu Club ban pynlong ia kane ka jingiakop kynting ball.
La don haduh 9 tylli ki club kiba la wan ban ia shim bynta ha kane ka jingiakop.
Ia ki nongjop la ai ia ka khusnam da ka Golden Boots bad ka ball kaba la pynwan dur kyrpang halor kane Election Lok Sabha.
Ia kum kane ka juh ka jingiakop yn pynlong sa ha shnong Smit da ka jingiatreilang bad ka Smit Football Club bad ka Seng Samla Shnong, kum juh ruh sha thaiñ Garo Hills.
