Mynnin ka janmiet ka 6 tarik u August 2026, ka National People’s Party ka la pynlong ia ka jingialang paidbah elekshon shiteng samoi na ka bynta u kyrtong Lok Sabha jong ka na ka bynta ka Shillong Parliamentary Constituency u Dr. D.R.L. Nonglait, ha ka shnong Rymbai, kaba don ha East Jaintia Hills District.
Ha kane ka jingialang la ia don lang da u Dr. D.R.L. Nonglait; u Symbud Myntri Rangbah ka Jylla Meghalaya u bah Sniawbhalang Dhar, ka MLA ka Sutnga Saipung Konstitwensi ka kong Santa Mary Shylla; ka Dr. Mazel Ampareen Lyngdoh MLA ka NPP, u ma Damanbait Lamare MLA ka NPP, ki MDC ka NPP ka JHADC, ki khlieh nongsynshar na ki katto katne ki shnong kiba don ha East Jaiñtia Hills; Ki nongialam bad ki heh jong ka NPP; bad ki nongshong shnong bad kiwei kiwei ki nongwan.
Ha kane ka sngi la kynthup ia ka jingpynrung dkhot sha ka NPP ha kaba uwei u MDC barim na ka Shnong Rymbai u la pyniasoh ialade sha ka NPP. Mynta ka sngi la pynrung kyrteng ruh ia ki nongialam na baroh ar tylli ki konstitwensi ha East Jaintia Hills — ka Khliehriat bad ka Sutnga Saipung. Palat 1,000 ngut ki briew ki la wan ban iashim bynta, ha katei ka jingialang la pyni ia ka jingshad kolshor.
Haba kren u Dr. D.R.L. Nonglait u la ong ba u kyrmen ba kane ka elekshon MP kan long kaba seisoh na ka bynta baroh. U la pdiang sngewbha ia ki nongialam ba thymmai bad u la jubab ia ki jingkylli balei u la pyniasoh sha ka NPP. U la ong ba u la rung namar ba u la iohi ia ka jingtreikam jong ka sorkar ba la ialam da ka NPP bad u la peit bniah ia ki projek thymmai, ki skhim, ki jaka pule, bad kiwei kiwei ki jingthmu.
U Deputy Chief Minister u bah Sniawbhalang Dhar u la kren halor ki jingkynnoh na ki katto katne ki seng saiñ hima ba ka sorkar ka la shim ram palat. U la pynshai ba man la ka sorkar ka shim ram bad ki don ki pud ban shim ram. U la ther ia ki party kiba treikam tang ha surok bad ki bym pyndonkam ia ka Assembly, bad ong “Lada ngi ialam bakla ia ki paidbah ha ki social media, ngim long kiba bit ban long ki politician.” U la bynrap ruh ba ki nongmihkhmat ki dei ban pynshai ia ki mat bym shai bad ban ialam da kaba bha ban rah ia ka jylla shakhmat. U Dhar u la pynpaw ba ka sorkar ba la ialam da ka NPP ka la lah ban wanrah ia ki jing myntoi ki bym pat don mynshwa ha Meghalaya, kum ka State University bad ka Government Medical College. U la ong ba ka sorkar ka trei shitom na ka bynta ka jingbha jong ka jylla bad kam ju jubab ia ki mat ki bym dei ban shimkhia. U la ban jur ïa ka jingïatylli hapoh ka seng, da kaba ong ba ka NPP ka buh ïa ki briew hakhmat eh bad ba ka jingïatylli jong ka seng ka la ïarap ïa ka jylla ban kiew ha kine ki 8 snem tam.
Ka kong Santa Mary Shylla ka MLA ka Sutnga Saipung ka la ong ba ka shnong Rymbai ka dei kawei na ki shnong ba heh tam ha East Jaiñtia Hills. Ka la kdew ia ka jingbun ki paidbah kiba wan sha kane ka jingialang bad ka la pynpaw ia ka jingsngewskhem ba u Dr. Nonglait un jop ia ka elekshon, da kaba ong ba ym duna ia ka 2,000 ngut ki briew ki don hapoh ka pandal. Ka la ong ba ka Sutnga Saipung Constituency ka la ioh palat 1000 klur ha ki skhim, bad ka la kyntu ia baroh ban ai ka jingkyrshan ia ka NPP ha kane ka elekshon shiteng samoi ban pynthikna ia ka roi ka par ka ban bteng. Ka la pynpaw ruh ïa ka jingtih dewïong kum kawei na ki jingeh kaba khraw tam jong ka district bad ka la ong ba ki jingeh ha ka thaiñ ki mih shi bynta na ka jingsngew ia pihuin, bishni bad ka jingbym ïatylli.
