Ka State Anti-Narcotics Task Force (ANTF), Meghalaya, ryngkat ka jingiatreilang bad ki pulit jong ka West Jaintia Hills, mynta ka sngi ki la ioh ban kurup ia u drok Heroin haduh 48.78 gram bad la antad ba ka dor ka iew be-ain kan long kumba ₹7 lak eiei.
Ia kane ka jingioh kurup la ioh ha ka por ba pynlong ia ka jingkhynra kali ha West Jaintia Hills. Ha ka por kumba 8:00 baje mynta ka mynstep, katei ka kynhun Pulit kala bat ia kawei ka bus kit nongleit nongwan jong ka Network Travels kaba don ia u number ML-05-T-8381 bad ha ka jingkhnra la ioh ban bat ia ki arngut ki nongleit jingleit ba la tip kyrteng u Robert Nongrum (33 snem) uba shong basah ha Umktait, Nongmynsong, Shillong bad u Batskhemlang Jarain (32 snem) uba shong ba sah ha Umktait Block-III, Shillong.
Ha kane ka jingtalasi la lap ar tylli ki pla plastic ba don ki synduk sabon ba la buhrieh hapoh ki jaket jong ki. Ia katei ka jingdih ba la lap hapoh la test ha katei ka jaka katkum ki rukom treikam bad la lap biang ba u dei u drok heroin, uba khiah 48.78 gram. Ia kine ki arngut ki briew kiba la shah kem bad ka jingtohkit ia ki ka dang ïaid shakhmat ban lap ïa ka tynrai ba la wanrah ia une u mar, ka jaka ba la thmu ban leit buh, ka jingdon jingiadei hapdeng ki jylla ka thaiñ.
Ka State ANTF, Meghalaya, ka la ong ba ka dang ïai bteng ban pynjur ïa ki kam khynra pyrshah ïa ki kynhun khaïi drok kiba treikam hapoh bad lyngba ka jylla. La kyntu ruh ia ki paidbah ba kin iatreilang bad ki bor jong ka ain da kaba iasam ia ki jingtip kiba iadei bad ka jingkhaii drok. La pyntip ba kino kino kiba lah ban pynioh jingtip yn ai bainong ia ki bad kane ka long kawei na ki jingpyrshang da baroh lang ban tei ïa ka Meghalaya kaba lait na ki drok.