Ka Dorbar shnong Namdong-B kala pynlong ïa ka jingjied Waheh Shnong ba thymmai ha ka sngi 4 tarik u Ïaïong, 2024 ha Community Hall Namdong-B, West Jaiñtia Hills District.
Ki nongshong shnong kila jied biang ïa u ma D.S. War ban long u Waheh Shnong ba thymmai hadien ba ula pynliem noh ïa uwei u kyrtong ba ïakhun pyrshah ïa u.
Ha kane ka Election jied Waheh Shnong la bud ryntih katkum ki jingbthah na ka JHADC bala pynïaid da u Dalloi ka Elaka Nongjngi u ma Pius Daw.
Haba ai jingkren u ma Damian S. War ula ai khublei ïa ki paidbah ka shnong ba ki la pynjop don burom biang ïa u sa ha kane ka samoi lyngba ki kam ba ula trei shitom ha ka samoi ba la dep bad ula kular ban dang ïai trei shitom naka bynta ban pynbit pynbiang shuh shuh ïa ka roi ka par khamtam ka shong suk shong shngaiñ hapoh ka shnong ka thaw.
Shuh shuh ula ong ba u candidate ba shah rem ne ki nongpyrshah ki bym vote sha u ha kane ka Election jied Waheh Shnong kim dei ban don kata ka jingsngew jngai, ula kyrpad ban ïatreilang ha ryngkat na ka bynta ka jingbha jingmiat ka shnong.
