U State President Meghalaya State Unit bah Prestone Tynsong uba dei ruh u Symbud Myntri Rangbah ka jylla haka jingkren ïalap election ïaka Dr. Mazel Ampareen Lyngdoh ka kyrtong NPP, ula ong “Uno uno u nongïalap Election haba u ieit ïa ka jaitbynriew dei ban sdang shwa nala rympei ïing la jong”. Ïa kine ki kyntien u bah Prestone Tynsong ula pynsngew haka jingïalap Election MP jong ka seng NPP kaba la pynlong mynta ka sngi Thohdieng ha ïew Amlarem West Jaiñtia Hills District.Ula ong kum ka Party ba synshar ïaka jylla, ki don jingthmu ban shakri janai ïa ki 36 tylli ki Constituency hapoh ka jylla bad ka nongrim jong ka NPP ka long ban ieit ïa ka jaitbynriew rit pait la jong, ym tang ha kane ka jylla hynrei haka Ri hi baroh kawei.
Shuh shuh ka Party kan ïada ban phikir bad ban pynneh pynsah ïa jinglong tynrai, ula ong ki don shibun tylli ki jylla hapoh ka Ri kiba kwah ban ïasoh bad ka seng NPP kaba don ïa kane ka nongrim ïeit jaitbynriew na ka bynta ki rit paid. Ula pynsngew ba ka Party NPP ka kwah ban pynkhlaiñ ban pynneh pynsah bad ban pyniwbih ïaka jingieit jaitbynriew lyngba ki kam bad kita ki kam ki long ban ieit shwa ïaka longïing kaba dei ka rympei tynrai.
U bah Prestone u ong kum ki kmie ki kpa ki dei ban ai jinghikai kaba bha tam ïa ki khun kaba nyngkong ka akor ka burom, kaba ar ka jingnang jingstad bad kaba lai ka jingtip briew tip Blei kata ka dei ka nongrim jong ka jingieit jaitbynriew.
Ula kynthoh ïa kiwei ki Party da kaba ong da phikir bha haba phi pyndonkam ïa kane ka ktien ‘Ieit Jaitbynriew’, namar ïa kane ka ktien la pyndonkam ïa ka da u mymbarim bajah. Ula kren pyrshah ruh ïa u President jong ka VPP halor ka jingai jait kpa bad kane ka jingai jait ka long kaba ma ïa ka Ri tip briew tip Blei kaba lah ban poi sha ka ri shong sang shong ma, ong bah Prestone.
Ula kynthoh ïa ka jingpyndonkam bakla ïa ki Account bym shisha ha ki rynsan Social Media kiba lah ban pynthaba ïa ki paidbah ha ki kam thok kam shukor. Haka juh ka por ula pynsngew ba ka jylla kam lah ban pynmih revenue nalade hi, hynrei ka dang shañiah ha ka sorkar kmie kumba 90% na ka shispah.“Mynta la mih sha ki Party thok jong ki Political kiba kular ïa ka bneng katba tang ïa ka dujok rum kim poi” bad kane ka jingkular shongshit kaba pynthaba ïa ki khun samla ula ong.Ula ai nuksa ïa ka rukom treikam ki MP da kaba ong sha Garo ki suk bha ban treikam namar ba ki ïoh ïa ka MP naka seng NPP bad kane kala pynsuk shibun eh ïa ka sorkar lyngba u Myntri Rangbah. Lada ka Shillong Seat ruh ka ïoh sa ka kong Ampareen kan da long ka jingmyntoi kaba khraw eh.
Ka kong Ampareen Lyngdoh haka jingkren kala ong ka jinglong kyrtong jong ka kum ka MP ka long ban pynsah nam ïa ka seng NPP halor ki kam ba bha, kum ka nongshakri paidbah kan wanrah ïa ki issue kiba donkam ha ka jylla bad ban wanrah ïa ki skim bapher bapher. Kala pynshai kum ka MLA kaba ju kren ïa ki issue ba donkam bad lada kan long ka MP kan leit rah kumjuh sha Parliament ïa ki issue kiba ïadei bad ka riti ka dustur jong ka jaitbynriew kiba la dep aiti da ka Ri India.
“Ka party NPP kam long ñiangkohnguh ha ki nongïalam jong ka sorkar kmie hynrei kan ïeng skhem ban ïada ïa ki aiñ kiba pynmynsaw ïa ka jylla, khamtam ïa ka jingngeit tynrai ban ïoh ïa ka hok shakri laitluid” ong ka kyrtong.
Ha kaba ïadei bad ki nongrep ka ong kim dei ban duh jingkyrmen namar ka sorkar NPP kala ai jingïarap naduh ki Village Organization, ki Self Help Group bad ki Committee bapher bapher ban pynkiew ïaka bor synshar dalade ïalade.
Shuh shuh kala pynsngew kum ka shakri paidbah kala mih na ka longïing kaba don haka kam saiñ hima sima naduh u kpa jong ïa kaba uba la aiti mynta ha ki khun ban shakri bha ïa ki paidbah. Kala kren pyrshah ïa ka jingkynthoh kiba wan lyngba ki Social Media bad ki bym lah ban long shisha hynrei ki dei tang ban pynthohbria ïa kiba bun ba lang.
Ïa ka jingïalang la pynïaid da u ma Stephan Mukhim haka jingdonlang naduh u State Working President ma Wailadmiki Shylla (MLA), ka kong Santa Mary Shylla (MLA), ma R.L. Tariang MLA ba rim ka thaiñ, ki MDC naduh u ma Phasmon Dkhar, ma Het Pohthmi, ma K. Langstang MDC, ki seng longkmie nalor ka paidbah ba wan sha kane ka sngi.