-Nalor ka jingpynbha ia ki surok sa u surok 4 Lane naduh Lad Umroi haduh Ratacherra: S. Dhar-
U Symbud Myntri rangbah ka jylla u ma Sniawbhalang Dhar (MLA), kynthup ïa u myntri sorkar ma Comingone Ymbon (MLA) mynta ka sngi 15 tarik u Ïaïong 2024 kila leit hiar haka shnong Iooksi (Thlongmo) West Jaiñtia Hills District ban pan jingkyrshan ïa ka Dr. Mazel Ampareen Lyngdoh kum ka kytong MP sha Lok Sabha na ka seng National People Party (NPP).
Ïa ka jingïalang la pynïaid da u Romius Suchiang Chairman shnong, haka jingdonlang u ma Nehemaya Tyngkan uba ju ïakhun MLA na katei ka thaiñ, u MDC ka Barato ma A. Shadap, ki riew rangbah bad ki spah ngut ki paidbah jong ka shnong kiba la wan ban sngap ïaki mat jong ka seng NPP kaba ïalam ruh ïaka sorkar jylla mynta ka kynti.
U ma Sniawbhalang Dhar ha ka jingkren ula ong ba kane ka MP mynta u snem ka long kaba shongshit tam, na ka daw ka jingwan ka Party thymmai kaba wan ban pynbeit ïa ki paidbah tang shiteng por.
Ka Party VPP kam poi shano shano hynrei ka long ka Party kaba triem ban ïalam bakla ïa ki paidbah da ki jingkynthoh bad kaba kop ïalade ba ka dei ka Party kaba hok bad kine ki jingkular baroh ki long kiba la bakla shwa, ong ma Dhar.
Ula pynsngew ruh shaphang ki kam pynroi kiba la dep ban wanrah sha kitei ki thaiñ 13 shnong, kiba kynthup naduh u surok uba la biang nadong shadong ban poi na Raliang-Iooksi-Saphai, bad da ka jingwan pynïasoh jong u ma Nehemaya ka thaiñ Iooksi ka dang lah ban pynkiew shuh shuh ïa ki kam pynroi kiba bun da ka jingïatreilang bad ka sorkar.
Ula kyntu ka jingwan jong ki mynta ka sngi ka long na ka bynta ka roi ka par jong ka shnong 13 shnong ki ban wanrah ha kine ki sngi ban wan, ynda ka kong Ampareen kan wan ha ka jingjop, ha kaba ka sorkar hapoh ka jingïalam NPP kan trei shitom naka bynta ka jingdonkam jong ki paidbah. Ula kyntu ïa ki paidbah ban jied da kaba peit shakhmat ïa u dieng uba la seisoh khnang ba kan long kaba suk.
“Ym tip kaei ka jingmut jong ka Party VPP ‘ban riewspah ruh ym long ban duk ruh ym long” la buh jingkylli u ma Sniawbhalang, namar ïa uba riewspah ki kynthoh ba ulong uba tuh katba ïa kiba duk ki wan ban pynbeit bad ban pynklumar jingmut ïa ki.
Ula pynsngew ruh ïa ki skim kiba ka sorkar kala leh bad kiba dang trei pyndep shait shait kata naduh ki skim seng kam seng jam kynthup ïa ki longkmie bad ki khun samla, ka jingpynpoi ïa ka um bam sha manla ki thliew ïing bad ka bording kumjuh.
Shuh shuh ula ong kum ka sorkar kaba ïalam ïaka jylla “ngi don ïa ka thong (Blueprint) ban trei ïa ki kam pynroi kiba wanrah jingmyntoi ïa ki paidbah nongshong shnong ka jylla baroh kawei.
Kaba hakhmat mynta ka sorkar ka don ka thong la kumno kumno hapoh san snem kan pynlong 4 lane ïa u surok naduh Lad Umroi haduh Ratacherra, kyrmen ba kane ka urlong noh, ong ma Sniawbhalang Dhar.
Na ka liang u ma Comingone Ymbon ha ka jingkren u ong haba jied ïa ki nongmihkhmat donkam ban tip ïa ka nongrim ym tang ban shah pynbeit, kum ki samla kiba dei ki lawei kim dei ban shah ïalam bakla, namar kam long kaba suk ban ïakynduh ïaki MP hynrei lada ka kong Ampareen ka wan haka jingjop kan pynsuk ban pynïakynduh ïa ka lyngba u ma Sniawbhalang Dhar bad ma u kum ki MLA ka Ri-lum Jaiñtia, hynrei lada jop kiwei la tikna ym shem poi lynti ei ei ruh em.
Ula kynthoh halor ka jingpynklumar jingmut jong u President ka VPP ban review ïa ka rukom thung kam thung jam hapoh ka jylla, kane kala wanrah jingeh pynban mynta da kaba jingïoh lad kiba namar ban thep kam hapoh ka jylla bad kaba ktah nyngkong ïa ki khun samla kiba dei ki trai jylla.
