-Ha bym don ka jingiohi jngai ka ri bad jaitbynriew kan shuh jah rngai: Dr. Syngkon-
Mynta ka sngi 15/4/24 ki nongialam jong ka Voice of the People Party (VPP) ba kynthup naduh u President Bah Ardent M. Basaiawmoit, Dr. Ricky Syngkon uba dei u kyrtong jong ka party ryngkat ki nongkyrshan, ki la wan ban pynlong ia ka jingialap elekshon MP ha Iawthymme, kaba don ha Ladthalaboh, Jowai.
Ha kane ka jingialang la ioh ka jingkren na ki rangbah ba kynthup ia u bah Ardent, u bah Brightstar Marbaniang, MLA ka Mawlai bad u Dr. Ricky Syngkon uba dei u kyrtong jong ka VPP bad kiwei.
U bah Ardent haba kren ha kane ka jingialang paidbah ula ong ba kum ka party ka la iaid shakhmat ban pynkhreh bha ia lade, bad ha kane ka kynti wat lada pynkyllaiñ katno katno ruh ki jingkylli u tip shai ba ki paidbah kin sa jubab da kaba dei ha ka 19 tarik mynta u bnai bad ka party jong u kan sa ioh ban shadkmen ha ka 4 tarik u Jylliew, 2024 hadien ka jingpynbna ia ka result MP.
U bah Ardent ula ong ba tang mynta ka sngi ka Party kala lah ban pynlong haduh 19 tylli ki jingialang bad ha ka sngi Saitjaiñ ki la lah ban pynlong haduh 24 tylli, bad ula ong shuh shuh ba katba dang bun ki jingialang jong ka VPP katta ka mynsiem jong ka NPP, BJP, UDP, HSPDP bad kiwei kiwei ki dang kyndeh klongsnam.
Mynta ka VPP kala poi ha ka kyrdan ha kaba ki paidbah bad ki nongshong shnong ha ki shnong bapher bapher kila iatrei ban pynbun ia ki nongkyrshan jong u Prah bad ban ai ka jingpynjop ia ka party VPP la ong shuh shuh u bah Ardent.
Na ka liang jong u Dr. Ricky Syngkon u la ong wat la ka jylla kala kynjoh sha ka 50 snem hynrei ha ka jaka ba kan nang kiew shaphrang ka la hiar pynban shatrai. U la ong ba ka jylla ka la ioh ia ki nongialam ki bym don ka jingiohi jngai, ‘Ha bym don ka jingiohi jngai ka ri bad ka jaidbynriew kan shu jah rngai’ ong u bah Syngkon. Kum ki nongialam kiba don ka jingkitkhlieh la sdang ia kane ka Party VPP na ka bynta ban pynim bad pynwandur ia ka ri bad ka jaidbynriew ha baroh ki liang ong shuh shuh u bah Syngkon.
Ki paidbah naduh ki nongwaniew wan hat bad ki nongshongdie kila pynshah skhor bha ia kaei kaba kine ki nongialam ka VPP ki don ban pynsngew ha kane ka jingialang.
