Ka KSU EJHDU lyngba ka Sports Committee ka la pynkup burom ia ki 6 ngut ki Samla ialehkai Sport na East Jaiñtia Hills District kiba ioh ban rah Takma ha ka lympung ialehkai jong ka North East Game 2024 kaba dang shuh dep long ha ka Jylla Nagaland ha u bnai Lber (March) 2024.
Ki Samla kiba shah pynkup burom ha ka seng ki long u Samla Repol Dkhar ula ioh khur ar tylli ki takma kawei ka takma Ksiar ha ka 4×400m Relay Men bad ka takma Rnong 4×100m Relay, u Samla Eleven Dkhar uba la ioh khur ar tylli ki takma kawei ka takma Rnong ha ka 800m bad ka Takma Rnong ha ka 4×4pp mixed relay, u Samla Bhalang Shadap uba la ioh ban khur iaka Takma Rupa haka Boxing (67kg), u Samla Knerlang Phawa U la ioh ban khur iaka Takma Rnong haka Cross Country Team Event, u Samla Phermiki Salahe u la ioh ban khur iaka Takma Rnong haka Compound Men Team bad ka Samla Rukini RT Dkhar ka ba la ioh ban khur iaka Takma Rnong 4×400m Relay Women.
Ka Seng ka la pynkup burom ia ki kine Samla ha ophis treikam jong ka haka jingpyniaid u Samla Shwari Ryngkhlem uba dei u Chairman ka Sports Committee bad haka jingiadon lang u Asst. Organising Secretary KSU EJHDU u Samla Donbok Mukhim, Samla Hamewanpynhun Ryngkhlem, Publicity Secretary KSU EJHDU, Ma Cherity Suja Asst. Finance Secretary KSU EJHDU.
Ka Seng ka dap da ka jingsngewsarong ia ka jingtrei shitom kine ki Samla namar ki la wan rah ka burom ka akor ia ka District bad iaka ïing ka Sem jong ki bad kumjuh ruh iaka jylla Meghalaya. ka Seng ka kyntu kynpham ia kine ki Samla ba kin nangtrei shitom bad im tip sngi ba kin nangioh ban khur takma ym tang ha North East Game hynrei kin ioh khur shaduh National bad International.
Kane ka long katkum ka kyrwoh khubor ba la pyllait da u Publicity Secretary ka seng u Samla Hamewanpynhun Ryngkhlem.