U ma Sniawbhalang Dhar uba dei u National Secretary ka NPP ha ka jingïalap Election na ka bynta ka kyrtong MP jong ka seng, ka kong M. Ampareen Lyngdoh kaba la long ha Iawmusiang mynta ka sngi Palei, ula ong ka sorkar hapoh ka jingïalam ka NPP ka wan sha ki paidbah da ka jingkitkhlieh kata ban buh hakhmat eh ïa u paidbah katba ka shuki ka don hadien.
Ha ka juh ka por ula ai ka jingïaroh ïa ka sorkar MDA kaba la ïaid lynti la 6 snem mynta kaba la wanrah shibun ki kam pynroi hapoh ka jylla, tang na ka bynta ka Jowai Constituency kaba ïoh shibun ki jingmyntoi kaba la kot ym duna ïa ka 850 klur tyngka lyngba u MLA u ma Wailadmiki Shylla hynrei ïa ki kam ba bha ym don kiba ïohi hynrei ki don tang jingshah kynnoh suda ïa ka sorkar bad kumjuh ïa ki nongmihkhmat.
Ula pynpaw ka jingsngewkmen ba ka Jowai kala kiew bha shakhmat ha kiba bun ki liang, da ka jingtrei shitom u MLA ma Wailadmiki Shylla bad la sakhi ïaka jingshongshit jong ka Election MP mynta u snem. Ha ka liang ki surok ula ong hapoh sor Jowai kim don shuh ki thliew ki syar bad ka Jowai kala ïoh ïaka skim Smart Town ha kaba kiwei ki sor hapoh Khasi Jaiñtia kim pat ïoh satia.
Ha kaba ïadei bad ka Party VPP u ma Sniawbha ula ong ba ka dei ka Party nong pynbeit paidbah don hi bad ka VPP kam dei kaba bam sap hynrei ka don ka sap ban bam.
Ula kynthoh ha kine ki por ïalap Election ki don bun ki party kiba kynthoh ïa ka sorkar mynta kaba shim ïa ka jingkitkhlei naduh ka kam ïapynbeit ïa u pud u sam, ka Them mator, ka CAA nalor kiwei de bad ka dei ruh Party ka don ka lynti kaba beit bad kaba bha shakhmat.
Shuh shuh ula ong ha kane ka mang tyngka bala dep ka sorkar kala wanrah haduh 27 hajar klur, na ka bynta ki khun samla 3 hajar klur, ïa ki longkmie ban seng kam 5 hajar klur, na ka YES Meghalaya ha ka kam Sports la buh 1 lak shi kynhun, katba ïa ki nongrep ym duna ïa ka 500 klur mala u snem.
Kumta la donkam ban ïoh ïaka MP kaba ïohi jngai lyngba ka jingïatreilang bad ka sorkar jylla, bad dei tang ka kong Ampareen kaba biang eh ban long ka MP na ka Shillong seat ong u Sniawbhalang Dhar.
Haka juh ka por ula kynthoh ïa u President ka VPP uba shait kylla Party na kawei sha kawei pat bad lada ki paidbah ki bakla ban jied ka long ka jingleh nohei na ka bynta ka lashai la shisngi.