Ka National People Party (NPP) West Jaiñtia Hills mynta ka sngi kala pynlong ïa ar tylli ki jingïalang ïalap Election kawei ha Iawmusiang Jowai Stand Ummulong bad kawei ha Iaw Pynsing shi bynta ban pan jingkyrshan ïa ka kyrtong MP ka seng ka Kong Mazel Ampareen Lyngdoh ka ban ïakhun na ka Shillong Parliamentary Constituency.
U bah Prestone Tynsong uba dei u State President ka Party ha ka jingkren ha Iawpynsing ula ong ka Election MP mynta u snem ka long kaba kham shongshit bad kaba khluid bha bad ka daw tynrai dei ba mih ka Party thymmai ka VPP namar wat ha ki jaka mane blei ruh la sawa ka sur Prah.
‘Ka Party VPP ka long kaba khampher bha haba ki leit ïalap Election namar ki khlem don ïa ki Agenda bad ka Agenda kaba ki leit ïalap Election dei ‘tang ma ki kiba hok’ bad ki ktien kynthoh ïa ki briew kiba riew spah’. Kum ki paidbah nongtheh vote ki dei ban da phikir bha namar kano kano ka kynhun kiba ong ïa ki kyntien “tang ma ngi” kata ka long kaba la lait lypa, ong u bah Prestone.
Shuh shuh ula ong ha ki por mynshwa ki don kiba shah ïalam bakla ïa ka jingngeit jong ka jingim haduh ba don ki longïing kiba la aiti lut wat ïa ki jingdon jingem baroh, hynrei mynta kala mih sha kawei ka seng kaba ïalam bakla kumne da kaba ong ieit jaitbynriew bad kiba pynsngew ïa u Tirot Sing, u Kiang Nangbah ha ka kyrteng u Prah bad kiba ïashad surok shimiet shimiet bad ka jingkawang maw.
“Nga i shyrkhei ïa kane ka ding kaba klang, kane ka long thik kum ka tsunami ka ban long kum kato ka longïing kaba la shah ïalam bakla” la pynsngew u bah Prestone.
Ha kaba ïadei bad ka Party Congress ka por kam shah shuh ïa ka, da kaba ong hashwa ba kin ïamih noh naka seng Congress kila ïohi ba ka dei ka longïing kaba ïapait ïapra shikmie, shikpa bad ki khun kiba don ha ka jingïashoh ïadat.
U bah Prestone ula ong ha kaba ïadei bad u ma Vincent H. Pala u long u briew uba bha hynrei sniewbok pat ba u dang neh haka broken Family kaba la sop ïa ka ïing da ka plastic.
Ha kaba ïadei bad ka kong Ampareen Lyngdoh la pynïeng kyrtong MP ïaka daka ïing ka sem jong ka NPP bad jingïarai lang da baroh bad haka juh ka por kam long kaba suk ïa ka longkmie ban leit poi sha baroh ki 36 tylli ki Constituency hynrei ka kong Ampareen kala poi lut.
Ula pynsngew ïa ki kam ki jam hapoh ka jylla la pynïaid katkum ka Constitution bad hashwa ban wanrah ïa ka CAB la mih ki jingpyrshah na kiba bun ba lang bad la ïohi ïaka thma kaba jur bad ha u 2019 hapoh ka jingïalam ka NPP kala pynlum pynlang ïaki kynhun seng bapher bapher jong ka thaiñ lam Mihngi ban phah ïaka shithi sha ka sorkar pdeng bad ban leit ïakynduh ïa u Amit Shah, hashwa ban wanrah ïa ka Bill CAB bad la ai jubad ba ïa ka Meghalaya la kular ban pyllait na ka jingtreikam ka CAB.
U kyrmen ba ka Party NPP ha kane ka kynti kan ïoh ïa ka jingjop ba don burom khnang ba yn lah ban ai ka jingshakri kaba bha tam ïa jylla hi baroh kawei.