Ka Party Indian National Congress (INC) ka la pynlong ia ka jingialang paidbah ialap Elekshon jong ka na ka bynta u Kyrtong MP jong ka Party u ma Vincent H Pala ha Iawpynkat hynne Ka sngi (06/04/2024) ha kaba da ki spah ngut ki Nongkyrshan jong ka party bad ki paidbah na ki shnong ka thaiñ Garampani ki la iawan sha kane ka jingialang.
U ma Vincent H Pala haba kren ha kane ka sngi u la khot la wer ia ki paidbah nongthep vote kane ka thaiñ ba kin kyrshan ia u ha kane ka kynti kumba ki la ai ka jingkyrshan ha kine ki 15 snem kiba la dep bad kum u Nongmihkhmat jong ki um ju pep ban shongdorbar bad ban kren ia ka jingdonkam jong ka jaidbynriew, jong ki nongshong shnong jong ka Shillong Parliamentary Constituency, ia ka Jylla Meghalaya bad ia ka thaiñ North East hi baroh kawei.
Ban long u Nongmihkhmat sha ka Dorbar Thaw-Aiñ Parliament Lok Sabha jong ka Ri India bad ban kren kam long kaba suk, kam dei kum ki MDC lane kum ki MLA kiba lah ban kren hapoh ka Iingdorbar katba mon lane ieng arsien laisien ban kren hapoh ka Iingdorbar, hynrei ha Parliament kaba eh ia uno uno u MP ban kren katba mon laitnoh satang ha ki Mat bad ki Phang kiba donkam eh jong ka jaitbynriew ne ka jylla kaba u ne ka mihkhmat, la katta ruh kum u Nongmihkmat uba ki la jied um ju pep ban kren hapoh ka Iingdorbar Parliament na ka bynta ki paidbah ka Constituency, ki jingdonkam jong ka Jylla bad ka ri hi baroh kawei.
Ha kane ka jingialang u ma Vincent H Pala u pynkut ia ka jingkren ialap Elekshon jong u da kaba kyrpad ia ki Nongthep Vote kane ka thaiñ Garampani jong ka 4 Mookaiaw Assembly Constituency ba kin ai ka jingkyrshan jong ki ia u sa ha kane ka kynti bad hadien ba u la wan ha ka jingjop ryngkat bad ka jingai jingmut jong ki paidbah un nangpynbha shuh shuh ban ai ka jingshakri ia ki paidbah ban ia kaba u la leh ha ki snem kiba la dep.
Ha kane ka jingialang la ioh ruh ia ka jingkren bad jingkyntu ia ki paidbah nongthep vote kane ka thaiñ ban ai biang ka jingkyrshan ia u ma Voncent H Pala u Kyrtong jong ka Party Congres ba un wan biang ha ka jingjop na ki nongkren kum u Ma Pyrkhat Pyrpet, ma Riyo Sten Ex.MDC, Ma Madonbai Rymbai Ex.MDC, Ma Richard Sing Lyngdoh MDC, Ma Brightstar Chyrmang MDC, Ma Experience Timung bad ma Rikut Pariem. Ia ka jingialang la pyniaid da u Ma Romius Suchiang.
