Mynta ka sngi ka 2 tarik u bnai June 2026 ka jingshong shah thngan jong u ma Marshall S.B. Biam, President jong ka Jaiñtia Coal Owners, Miners, Suppliers & Workers Association (JCOMSWA), ka la poi sha ka 29 kynta.
Kum ban shu pynkynmaw ba u Bah Marshall mynnin ka miet jong ka 1 tarik u la shah pynkynriah noh na phyllaw ka office u DC ka EJHD namar ba u khlem ïoh ia ka jingbit ban shong shah thngan ha katei ka jaka.
Mynta ka sngi na ka liang ki seng long kmie, ki seng bhalang bad ruh ki katto katne ki waheh Shnong ki la wan ban ai mynsiem ia u Bah Marshall ia kaba u la hap ban shah thngan noh sha kawei ka jaka katta ha Rymbai Road.
U Bah Marshall haba kren sha ki lad pathai khubor mynta ka sngi u ong ïa mynta ka met ka phad ka jong u ka dang biang bad ïa kane ka jingshah thngan kan dang ïaid beit sha khmat katba ka sorkar kam pat lah ban rai ban plie noh ïa u dewïong.
U President jong ka HYDC EJHD u Bah Mihsalan Thoo haba kren mynta ka sngi, u ong ba baroh ka pyrthei ka tip ïa ka East Jaiñtia ba ka riewspah bha ha u mar poh khyndew katta u dewïong, u la kylli ruh balei ka bor synshar district kam ailad ïa u ba un shong shah thngan ha phyllaw ka DC ophis, namar ba um dei u briew uba na bar jong ka district, u la kyrpad ïa baroh kiba ïa don kti lang ha ki kam khaïi dewïong ba kin wan sha khmat ban ai ïa ka jingkyrshan ia u bah Marshall, namar ba lada ym lah ban plie ïa u dewiong ka district, ki nongshong shnong jong kane ka thaiñ kin long kiba ïap noh.
