U District Election Officer (DEO), West Jaiñtia Hills District ula pyntip ba ka West Jaiñtia District ka don haduh 2,07,374 ngut ki nongthep vote na ki 312 tylli ki polling Station ha ki 5 tylli ki Assembly Constituency kiba kynthup ia ka 1-Nartiang (ST) 2- Jowai (ST), 3-Raliang (ST), 4 -Mowkaiaw (ST) bad ka 7 – Amlarem (ST) Assembly Constituency.
Ha kaba iadei bad kane na ka liang u DEO ula buh ka jingkyntu ia baroh kiba nongthep vote jong kine ki 5 tylli ki Assembly Constituency ba kin iamih paidbah ha ka 19-04-2024 kaba dei ka sngi thep vote ba kin ioh ban pyndep ia ka hok thep vote jong ki. U la kyntu ia ki nongthep vote ba kin jied da la ka mon la jong iano kin thep ha kane ka elekshon Lok Sabha. La pyntip ba ka jingiathep vote kan sdang naduh ka 7:00 AM bad kan kut haduh ka 4:00 PM jong katei ka tarik.
Ha ka juh ka por na ka liang jong u DEO ula kren shai sha baroh ki nongshong shnong ba kim dei ban don kano kano ka jingsngew artatien lane ka jingsheptieng ia ka jingtreikam jong ki EVM bad ki VVPAT, bad la pynthikna ba baroh ki vote kiba la kin sa thep kin leit thik sha u ne ka kyrtong kaba ki mon hi.
U DEO ula pynpaw shuh shuh ba ka jingiashim bynta jong ki nongshong shnong ha ka jingjied ia ki nongmihkhmat ka pyni ia ka jinglong nongkitkhlieh jong ki ha ka synshar khadar jong ka ri.