U District Magistrate jong ka West Jaiñtia Hills District u bah B.S. Sohliya, IAS, haba pyntrei kam ia ka kyndon aiñ 126 jong ka Representation of the People Act, 1951, khnang ban lait na kino kino ki jingpynwit pynthut bad ban teh lakam ia ka shongsuk shongsaiñ hapoh ki 48 kynta, u la pynjari da ka kyndon 144 CrPC ka ban treikam naduh ka por 4 baje janmiet mynta ka sngi 17/4/2024).
Lyngba kane ka kyndon u DM ula pyntip ba la khang ia ka jingialap elekshon naduh ka por 4 baje janmiet mynta ka sngi.
La khang ia ka jingpynlong ia kino kino ki jingialang paidbah ne ki jingiaid porseshon, ha kaba la khang ruh ia ki riew shimet ban iadon bynta ha kino kino ki jingialang paidbah khamtam kiba iadei bad ka kam elekshon.
La khang ruh ia ka jingpyndonkam ia ki kor pynsawa (loud speaker) hapdeng ka 48 kynta.
Lada don kino kino ki mar ki mata ne ki riew paidbah kiba wan poi na kiwei pat ki District ban iashim bynta ha ki kam ialap elekshon hapoh ka District West Jaiñtia Hills ki dei ban mih noh mar sien kut ka por ialap elekshon. Kane ka hukum kan ym khang ia ki nongkitkam jong ki Political party kiba dei peit ia ka State Headquarter hapoh ki por jong ka Elekshon sha ka Lok Sabha 2024.
La khang ia ka jingpynmih ia ki khubor kiba pyni ia ka jingioh vote tam ne ka jingkhein vote da ki riew shimet, la ka dei ha ki kot khubor (print media) ne ki electronic media. Kane ka hukum kan ym khang ia ki Assistant Returning Officer, ki Zonal Magistrates, ki Sector Magistrates,ki Polling Officials bad ia baroh kito kiba don bynta ha ka duty elekshon.
Kumta ha kaba iadei bad kane ka kam ia kane ka hukum la pyntreikam ha baroh ki bynta jong ka West Jaiñtia Hills District bad kan treikam naduh ka por 4:00 PM jong ka 17 tarik u April 2024 bad kan neh haduh ban da kut ka jingthep vote.