Kum u nongmihkhmat ka dei ka kamram jong nga ban peit ïa ka eh ka shon jong ka Constituency hi baroh kawei ong u ma Wailadmiki Shylla haka jingwan hiar ïalap Election MP na ka bynta ka seng NPP mynta ka sngi ha ïing Dorbar Hall jong ka Dorbar Shnong Dulong, Jowai.
Ha kaba iadei bad ka Jowai Constituency kam long kaba suk ïa u ban shakri ïa ka namar ka don ar bynta, shi bynta ka dei ka jaka sor (Urban) bad shi bynta ka dei ka jaka nongkyndong (Rural), hynrei lyngba ka jingkyrshan lang jong ka MP lada kan wan ha ka bor kan long ka jingmyntoi kaba khraw eh, ong ma Wailad.
Ula pynsngew ruh ïa ki skim jong ka sorkar kmie kiba la wanrah na ka bynta ka Smart Town ïa ka Jowai kaba la kot da ki 79 klur ha kaba ka dei tang ka Jowai kaba la ïoh ïa kane ka pisa hapoh Khasi bad Jaiñtia.
Ula ong ha kaba ïadei bad ka jingïoh skim kham bun sha Garo ka dei da ka jingdon jong ka MP jong ka NPP kaba la trei shitom ban pynïoh ïa ki skim ba bun jait.
Ula ong ka don ka por ïa kiei kiei baroh bad mynta ka por kala dei ban ai jingkyrshan noh ïa ka NPP naduh District, haka jylla bad ban pynjop don burom ïa ki kyrtong MP ka seng shaduh Parliament.
Ha kaba ïadei bad ka party Congress u ma Wailad ula ong kala nang hiar shuh shuh katba dang mih ki sngi bad la sngewthuh tikna ba ka BJP kan wan biang ha ka bor synshar.
Ula kynthoh ruh ïa kito ki party kiba kdew kti ha ki por ïalap Election bad ula pynpaw ka jingsngewsih halor ka jingshah kynnoh jong ki nong Jaiñtia bad ki jied nongmihkhmat da ka pisa hynrei kam long kumta namar ki nongkyrshan hi kiba wan ïarap ïaki kyrtong da ki mar bam ha ki por Election.
Ula kynthoh ruh halor ka jingleh jong u President ka VPP uba la ïakhih halor ka Reservation Policy kaba la ktah mynta ïa ki paid Khasi Jaiñtia ha kaba kiwei pat ki bar jylla kin ïoh lad ban wan apply ïa ki kam ki jam haduh 15 percent hapoh ka jylla.
Kumta u kyntu ïa ki paidbah nongkyrshan ba kim dei ban shah ïalam bakla ha kiwei pat ki party, hynrei ki dei ban skhem ban ai jingkyrshan pura ïa ka NPP ha kane ka kynti jong ka Election MP.
