U ma Puramon Kynjing uba dei u Dolloi ka Elaka Jowai, ha ba ai jingkren mynta ka sngi ha ka jingialang kaba la pynlong ha Iawmusiang, u la pynshlur ia ki paidbah nongthep vote ba kin mih sha khmat ban ïashim bynta ha ka jingthep vote MP Lok Sabha ka ban sa long ha 19 tarik mynta u bnai.
Ha ka jingiashim bynta lang bad ka ophis jong u Chief Election Officer (CEO), ka jylla u Dolloi ka Elaka Jowai u la ioh ban ia don bynta lang ha ka prokram ban pynsngewthuh paidbah halor ka jingdonkam ban ïashim bynta ha ka jingjied ia ki nongmihkhmat paidbah.
U ma Kynjing u la pynshlur ia ki paidbah ban mih shakmat ban pyndep ia ka jingthep vote jong ki ha ka 19 tarik. U la ong ba ka jingthep vote kam dei tang ka jingpyndep kamram ne ka hok lajong, hynrei ka dei ruh ka jingkitkhlieh kaba kongsan ha ka Ri synshar paidbah, khnang ban ioh jied ia kita ki nongmihkhmat ki ban ialam ia ka ri bad ka jaitbynriew.
Ha kane ka sngi la iadon lang ruh u Deputy Commissioner ka West Jaiñtia Hills District u bah B.S. Sohliya, IAS. Haba kren ha kane ka sngi ula iaroh ia ka ophis jong u CEO ka jylla kaba la shim khiah ban pyniaid shaphrang ia ka jingpynkhreh ban pynlong ia kane ka elekshon kaba iaid beit iaid ryntih. U la ong ba ka jingwan jong ki paidbah ban thep vote kan iarap ban ioh ia ka jingsynshar kaba khlaiñ ha ka jingsynshar paidbah.
Kiwei de kiba iadonlang ha kane ka jingialang ki long u ma Arwotki Sumer, General Secretary Seiñraij Jowai, u Sangot ka Raij Jwai, ka kong D.V. Lyngdoh, ADC bad kiwei.
