-‘Ki Pulit ki kloi ban kem tang ia ki dkhot sengbhalang ym ïa ki nongpyniap briew’: Sengbhalang-
Ki paid nongshong shnong ka Mupliang, West Jaiñtia Hills District mynta ka sngi (9/4/2024) kila ïa mih paidbah ban ïashim bynta ha ka jingïaid rally halor ka jingshah pynïap dusmon u (L) Kyrshandame Talang ka ba la jia ha ka 10 tarik Lber 2024.
Ïa kane ka jingïaid rally la sdang na Dong Wah ba don ha Dorbar Hall ka shnong Mupliang bad ïaid ter ter kumba saw kilo miter eiei bad leit pynkut ha madan phutbol jong ka shnong Myrjai.
Kane ka jingïamih paitbah jong ka shnong Mupliang bad ki shnong ba marjan ha ryngkat ki khynnah skul ka long kum ka dak ban pynpaw ka jingsngewkhia mynsiem ïa katei ka jingjia ba sngewsih jong u para shnong. Ha kane ka sngi la mih ka jingpynrem jur ïa ki bor sorkar khamtam ïa ka tnad Pulit ba haduh mynta ka sngi la jan dap shibnai kim pat ïoh kem ïa ki runar ba donkti pynïap ïa u (L) Kyrshandame Talang da kaba leit bret ïaka met ïap ba lyngkhuid ha lyngkha kba.
Ha kane ka sngi kiba bun na ki nongkren naduh ki nongïalam shnong kiba kynthup ïa u Waheh Shnong ma Pyrphat Sna, Secretary shnong ma Dathmulang Ryngkhlem, u ma Pormi Talang uba dang dei Pyrsa bad u (L) Kyrshandame bad ki nongïalam na ki saw tylli ki kynhun seng bhalang ba kynthup ïa ka HNYF, KSU, HITO bad ka JSM.
Baroh kitei ki nongkren kiba pynrem jur ïa ka rukom treikam jong ki bor sorkar kaba la tlot shaba palat, da kaba kynthoh ruh ïaka jingtreikam jong ki kaba ym don shuh ka jingshngaiñ ïa ki paidbah nongshong shnong. Kaba la pynsyier mynsiem ïa ki nongshong shnong ha ka leit ka wan jong ki.
Ki nongïalam seng bhalang jong kitei ki saw seng kiba kynthoh jur ïa ki pulit kiba nang bad kloi ban leit kem tang ïa ki dkhot sengbhalang haba ki ïoh ïa ki daw ba rit, katba ïa ki kam pynïap briew kim don jingtip eiei ruh em la kynthoh jur kitei ki nongïalam sengbhalang.
Ki nongialam sengbhalang kila kren dom “lada ki pulit kim lah ban shimkhia ïa kane ka kam, la dei ban aiti noh ha ki nongïalam sengbhalang ban leh ïa kaba donkam”.
Hadien ka jingïalang bala pynïaid da u Chairman Shnong Moopliang ma John Sna ha Dong Wah ba don ha Dorbar Hall jong ka shnong ki khynnah skul jong ka shnong Mupliang ha ryngkat ki paidbah da ki spah ngut kiba la rah lang ïa ki jingthoh pynrem bad ki jingpyrta kila pynlong ïa ka jingïaid rally ban pynpaw sha ka sorkar ba kan shim khia noh mardor ïa kane ka kam na ka bynta ban pynïoh ïa ka hok jong u samla (L) Kyrshandame Talang uba la shah pynïap dusmon.
