Da ki spah ngut ki khynnah rit kiba napoh ka Sor Jowai bad nabar kiba 7 snem shaneng ki la iawan shim bynta ha ka jingplie ia ka sngi ai jinghikai ia ki khun jong ka Balang Katholik ym tang ha ka jinghikai shaphang ka Niam, hynrei ka jinghikai ka kynthup ia ka Tipbriew, Tipblei, ia ka Riam ka beit, ia ka kor ka burom, ka jingkohnguh ia ki Kmie ki Kpa bad ia kiba halor jong ki.
U Phadar Augustine Lamin, uba long ruh u Parish Priest jong ka Parish Jowai, haba kren ha kane ka sngi u ong ba u dap da ka jingkmen ka bakhraw haba la lah ban plie hynne ka sngi 14/6/2026, ka sngi ban sdang ia ka jinghikai ia ki khynnah rit, kiba dei ki khun jong ka Balang kiba 7 snem shaneng. “Ngi shim ia kane ka lad ban ai ka jinghikai ia ki khynnah rit namar ba la sngewdonkam ia ki khynnah rit ba kin ioh ia ki jinghikai naduh dangrit ba kin tei ia ka longbriew manbriew jong ki ha ka tipbriew, tipblei, tipkur, tipkha, ha ka riam ka beit bad ha ka burom ka akor naba la sngewthuh ban shu shaniah tang ha ki kmie ki kpa kiba beh khih beh bylla kam da biang eh bad la donkam ia kum kine ki jinghikai kiba kyrpang”. la ong u Phadar Augustine.
Shuh shuh haba pynkut ia ka jingkren jong u, ula kyntu ia ki kmie ki kpa ba kin phah tista ia ki khun jong ki sha kum kane ka jinghikai naba ka jinghikai ka ban tei ia ka longbriew manbriew jong u ne ka khynnah lashai lashisngi.
Ha kane ka sngi la jied bad la pynkupbor ia kumba 15 ngut ki Rangbah bad ki Longkmie kiba la ioh ia ka jinghikai (Training) kaba tbit na ka Shlem jinghikai na Lumbihsyntu, Bishop’ s House ki ban long ki Nonghikai ki ban hikai ia kine ki khynnah rit, kiba dei ki khun jong ka Balang bad ban pynrung ha ka jingmut jingpyrkhat jong ki naduh dangrit ba kin long kiba tipbrew tipblei, kiba tip burom tip akor, kiba ieid ia ka Balang, ia ka Ri bad ia ka jaitbybriew.
[Ki Nonghikai kiba la shah pyntbit ban ai jinghikai ia ki khynnah rit]