Ka jingshah thngan u President ka Jaintia Coal Miners & Supplier Workers Association (JCOMSA) kaba la sdang naduh ka 1 tarik Jylliew ha Cmpound Ophis u Deputy Commissioner Khliehriat, ia uba la shah pynkyriah jubor na Compound ka DC Ophis Khliehriat bad pynkynriah sha Madan Bol jong ka Ladrymbai Dongwah, mynta ka la dap 14 sngi kynthih ka jingshah thngan u Marshal S.B.Biam halor ka jingdawa na ka Sorkar ba kan wengnoh shisyndon ia ka jingkhang tih dewiong bad pynlait ia ki trai Pardewiong ba kin ioh ban tih bad die ia u Dewiong kumba ka long ha shwa ki 12 snem mynshwa.
Haduh ba thoh ia kane ka Khubor ym pat ioh jingtip eiei haduh katno ka Sorkar ka shimkhia halor kane ka jingshah thngan u President jong ka Association (JCOMSWA) bad na ka liang u President ma Marshal S.B.Biam, haba kren ha u YUTIP, u ong katba ym pat ioh jubab na ka Sorkar ba ka la pynlait ban tih Dewiong kumba ka long ha shwa ka 12 snem mynshwa, un iaibteng ka jingshah thngan na ka bynta ka jingmyntoi jong ki longiing longsem kiba don pardewiong bad na ka bynta ka jingmyntoi ki paidbah kiba im ha ka bylla bad tihdewiong kaba wanrah ka ioh ka kot jong ki. “Ka jingshah thngan jong nga kam dei na ka bynta ka jingmyntoi jong nga shimet hynrei ia ka jingmyntoi ki nongshong shnong jong ka East Jaintia Hills baroh kawei” ula ong shuh shuh.
Hynnin ka sngi (13/06/2026) ha ka jingshah thngan u ma Marshal S.B.Biam ka la kot 300 kynta, ka Doktor kaba trei ha ka Urban Health Welness Centre, Ladrymbai, Dr. M.D. Saioo bad ki para ba iatreilang jong ka kiba kynthup ia ka Nurse kong New Born Dkhar bad kong R.Dkhar ANM, ki la wan ban peit bad examin ia ka jingkoit jingkhiah jong u President ka JCOMSWA, ma Marshal S.B.Biam bad ha kane ka jingexamin jong ki, la ong ba u ma Biam u la tlot shaba palat bad ka BP jong u ka la hiar shaduh ka 90/50 bad la donkam ban ai drip shisyndon bad ha ka por janmiet, u la ioh ia ka Drip ba un nangioh bor ban bteng ia ka jingshah thngan jong u lane ba un weng bad leit shah sumar, la katta ruh ka shong ha ka mon jong u, na ka liang ka Dr. D.M. Saioo, haba kren ha u YUTIP ka ong ba ym don jingpynbor eiei.
