Ia ka 12th International Yoga Day la rakhe ha Khliehriat Community Hall, East Jaintia Hills District, hapoh ka jingïalam jong ka National AYUSH Mission. Ha kane ka prokram la wan ban iashim bynta shitrhem kumba 200 ngut ki nongïashim bynta, kynthup ïa ki samla pule, ki ophisar bad ki riew paidbah.
Ia kane ka jingrakhe la wan ban pynphuh pynphieng da u Addl. Deputy Commissioner, ka East Jaintia Hills u bah S. Mawkon kum u kongsan bad u Waheh Shnong ka Khliehriat West u ma Justine Dkhar uba dei ruh u MLA barim ka Khliehriat Constituency u ba long kum u Symbud kongsan.
La pdiang sngewbha ïa ki kynrem ki lyndan bad ki nongïashim bynta da u Dr. Melonius Lamin, District Nodal Officer, National AYUSH Mission, East Jaintia Hills District.
Ha ka jingïakren jong ki, ki kynrem ki lyndan ki la ban jur halor ka jingdonkam jong ka yoga ha ka ban kyntiew ïa ka koit ka khiah jong ka met, ka jingkoit jingkhiah ha ka jingmut jingpyrkhat bad ka rukom im kaba koit ba khiah. Ki la ai mynsiem ruh ïa ki nongïashim bynta ba kin pynlong ïa ka yoga kum ka bynta kaba man ka sngi jong ka jingim jong ki.
La pynkut ïa ka jingrakhe da ka yoga session kaba la ai jinghikai da ka Dr. Ewaka Medari Siangshai. Ïa ki jingïalehkai bad ki jinghikai yoga bapher bapher la pynïaid da u Dr. Samlang Kyndiah, ka Dr. Sowidaroi Bamon bad ka Kong Factious Dkhar, kiba la ïalam ïa ki nongïashim bynta ha ki rukom leh yoga bad ki buit treikam bapher bapher.
Kane ka prokram ka la long kaba jop bad ka ba pyni ruh ïa ka jingkiew jong ka jingtip bad jingithuh ki paidbah ïa ka yoga bad ki jingmyntoi jong ka hapdeng ki nongshong shnong ka East Jaintia Hills District.
