Ka Myntri jong ka sorkar pdeng kaba dei peit ïa ka tnad Finance & Corporate Affairs ka Nirmala Sitharaman mynta ka sngi 20 tarik u Jylliew, 2026 kala wan hiar sha West Jaiñtia Hills haka sien kaba nyngkong ban plie ïa ka surok Jowai-Nartiang- Kdiap-Khanduli (JNKK) haka jingjrong kaba 59.955 Km, ïa kaba la bei pisa daka New Development Bank (NDB) haka jinglut kaba Rs. 59.48 klur ha madan ïalehkai Wahiajer Multi Sports Complex Staduim, Wahiajer.
Ha kane ka sngi la wan synran lang ïa ka Myntri sorkar da ka jingdonlang u Chief Secretary ka jylla u Dr. Shakil P Ahammed, IAS, u Symbud Myntri Rangbah ka jylla u ma Sniawbhalang Dhar, u myntri ka koit ka khiah ma Wailadmiki Shylla, u myntri ka tnad pule puthi u ma Lahkmen Rymbui, u D. Vijay Kumar, IAS Commissioner and secretary planning, finance, agriculture and farmers welfare, ka kong Santa Mary Shylla (MLA), ki MDC ka thaiñ nalor kiwei kiwei de.
Naka liang u ma Sniawbhalang Dhar ula pynpaw ka jingsngewnguh halor ka jingwan jngoh jong ka Myntri bad ula ai ka jingïaroh ïa ka jingnoh synñiang jong ka kum ka myntri pla tyngka jong ka ri India bad da kaba pynpaw ba ka jylla Meghalaya kala ïoh jingmyntoi shibun hapoh ka jingïalam jong ka, ula kdew ïa ka jingtei ïa ka madan ïalehkai Wahiajer Multiple Sports Complex Stadium lyngba ka jingbei pisa jong ka sorkar pdeng kum ka nuksa ba kongsan jong ka roi ka par jong ka jylla.
Ha kane ka sngi na ka liang ka ka Nirmala Sitharaman kala ïoh lad ban ïakren bad ki samla pule jong ka Kiang Nangbah Government College, Jowai, da kaba ai jubab ïa ki jingkylli jong ki samla pule ha kiba bun ki liang, ha ka juh ka por kala pynshlur ïa ki samla pule ban don ka thong na ka bynka la lawei jong Ri hi baroh kawei.
Nangne ka Myntri kala leit ïakynduh ruh ïa ki khynnah ïalehkai phutbol (Grassroot) jong ka Wahiajer Centre ha katei hi ka madan.
Na Wahiajer ka Nirmala Sitharaman kala leit jngoh ruh ïa ka jaka leh ñiam ki Hindu ka Temple Shree Ma Jayantee, nangta kala leit jngoh ïaki mawbynna shanam (Monoliths) kiba don haka Shnong Nartiang, ha kaba la don ka jingpyni nam ïa ki mar rep tynrai kiba pynmih hi napoh kane hi ka thaiñ da kaba leit jngoh ruh ïa ki Stalls bad ki jingbatai na ki nongshna bad ki nongrep.
Nangta ka Myntri kala leit jngoh sa ïa ka jaka shna khiew khyndew kaba don ha ka shnong Larnai, West Jaiñtia Hills District, ha kaba naka liang ka myntri kala ïoh lad ban thaw khiew lang daka jingïarap ka nongthaw khiew na katei ka shnong, kaba la pynsngew ruh ïa ka jingtbit ka Myntri kaba don shisha ka sap ban thaw khiew wat haka jingpyrshang jong ka haka sien kaba nyngkong.
[Ka Nirmala Sitharaman, ka dang iashim bynta ha kaba pyrshang ban shna ia ki khiew khyndew ha shnong Larnai, West Jaintia Hills]