Kumba 80 (phraphew) ïing tam kiba don ha ka dong Kpermynsnieh bad Neiñ Phylloh ba hap hapoh ka shnong Moodop Nartiang, West Jaiñtia kila shong khlem ka bording electric la kumba shi bnai tam ei ei, ha kaba kane ka la ktah ia ki long ïing kiba don ha kitei ki dong jong ka shnong Nartiang naduh ki khynnah pule ki kam ki jam jong ki briew, ki ïing kiba pyndonkam ban shet ban tiew da ka bording bad kiwei kiwei ki jingdonkam kiba man ka sngi.
Halor kane na ka liang ka seng Hynniewtrep National Youth Front (HNYF), hapoh ka jingialam u samla T. Shylla ki la leit ban ai da ka dorkhas ha ka office jong ka MEPDCL lyngba u Assistant Executive Engineer Khliehtyrchi Distribution Sub-division.
Na ka liang jong u samla Shylla u la ong ba ka MEPDCL, ka dei ban shim khia mardor ia kane ka kam khlem da pynslem shuh lym kumta na ka liang ka seng kam banse ban shim da kiwei ki lad ki lynti.
Shuh shuh u la bynrap ba kat bym pat lah ban pynbiang bording electric ia kitei ki ïing kiba don hapoh katei ka shnong kim bit satia ban leit pynpoi bai bording lym kumta ka seng kan sa shim da kiwei ki rai ryngkat bad ki long ïing kiba shah ktah jong katei ka shnong, pynkut ka kyrwoh na u samla Tyrchaiñ Shylla Secretary (HNYF) Jaintia Hill District.