Sa tang shi sngi bad khyndiat kynta ka jylla Meghayalaya kan sa leit sha ka jingiathep vote na ka bynta ka Elekshon Lok Sabha bad ha kane ka kynti ka jingpynkhreh lyngba ka ophis u Chief Electoral Officer, Meghalaya kam dei shuh tang ban pynioh ia kata ka Free and Fair Election hynrei ban khring ruh ia nongialam na ki shnong naduh ki nongkyndong kynshrot ban iatrei lang ban pynioh ia ka lection kaba long Clean and Green.
Ia kum kane ka prokram la lamkhmat bad sdang mynta ka sngi da ka shnong kaba la ioh ia ka nam ba khuid tam hapoh Asia (Asia’s cleanest village) kata ka dei ka shnong Mawlynnong, ha kaba ki samla shynrang bad kynthei ki longkmie longkpa kila iamih paidbah ban pynkhuid ia ka Polling Station kaba don ha ka skul ba pyniaid da ka Balang Church of North India.
Ha kane ka sngi u Rangbah Shnong ka Mawlynnong u bah Thomlin Khongthohrem ha ba ai jingkren ula ong ba long kaba ai mynsiem haduh katta kata ban tip ba ka ophis jong u CEO bad ka Election Department kila shim ia kane ka lad ban ialam sha ka jingpynkhuid ia ka Polling Station, bad dei lyngba kane ka pynpaw ia ka dak ka shin ba kane ka elekshon kaba mynta kan long kaba khuid ba suba kaba lait na kino kino ki bor jong ka pisa bad ka jingshah pynbam pisa.
La ioh ruh ka jingkren na u Rangbah Shnong jong ka wei na ki shnong napoh Shillong ka Nongrim Hills u bah Bantyllilang Narry uba la pynpaw ba kane ka jingleh jong ka tnad Election ka long kaba dei eh, khnang ba yn lah ban pynlong iaki jaka thep vote (Polling Station) kiba lait na ki jakhlia bad ki plastic khamtam wat hadien ba la dep ka jingiathep vote ruh. Kane kan long kum ka khubor sha baroh ban ai ka jingiada ia ka sawdong sawkun.
Na ka liang jong u CEO ka jylla u Dr. BDR Tiwari, IAS, ula pyllait ruh ia ka jingshimsoskular (pledge) ba baroh kiba dei duty elekshon kin iasnohkti lang bad ka shnong ka thaw ban pynlong ia ka jingpynkhuid pynpliah ia ki polling station, kum ka dak jong ka jingwanrah ia ka khuid ka suba jong ka sawdong sawkun ka mei mariang.
Ia kane ka soskular kaba la thoh ha ka ktien English ka long kumne “We the responsible voters of India abiding by the tenets of Democracy of this great country, hereby, pledge to uphold the spirit of stewardship by ensuring Clean and Green practices while participating in the Elections, aligning our citizens’ actions with our shared values, embedded in our electoral integrity by shunning inducement and caring for the environment, cutting across religion, race, caste, community and language”.
Shuh shuh na ka liang jong u Dr. Tiwari u la khot lang ia baroh ki seng saiñ hima sima bad ia shim bynta lang ha kane ka Elekshon da ka jingshimkhia kaba pyniaryngkat ia ka mei mariang, ula ai khublei ruh ia baroh kiba la iashim bynta lang ha kane ka sngi ha ka ban pynkhuid ia ka Polling Station.
U ong ruh ba kane ka elekshon Lok Sabha ka long ruh kaba donkam kumjuh kum ka elekshon hapoh ka jylla hi. U ong ba ka long kaba donkam ban sngewthuh ba ka jingwan bun sha ka jingthep vote ka pyni ba ki nongthep vote ki pyndep hok ia la ka jong ka kamram kum ki nongshong shnong kiba shisha jong ka Ri India ba iar bad ka jylla Meghalaya hi.