Ka Kiang Nangbah Government College Students’ Union (KNGCSU) Jowai lyngba u President samla Evermore Rymbai ula pynsngew halor ki kam pynbha pynmiat kiba la pyntreikam mynta hapoh ka Kiang Nangbha Govt. College, Jowai bad u kyrmen skhem ba kine ki kam pynroi kin long kiba ïaid beit shakhmat na ka bynta ka jingmyntoi jong ki samla pule.
Utei u President ula ong da ka jingïarap u Symbud Myntri Rangbah ka jylla u ma Sniawbhalang Dhar hadien ka jingkular la lah ban phah pynbha pynmiat mynta ïaka phyllaw bad ka jaka ïaid kjat (Footpath) jong ka College, hynrei ki dang don ruh sa kiwei de ki bynta ban pynbha ïa ka College lyngba ka jingkular jong u MLA ma Wailadmiki Shylla.
Ha ka juh ka por ula ai khublei kumjuh ïa ka sorkar kala la thep ïa kine ki lad jingïarap ïa ka College bad u kyrmen skhem da ka jingïatrei hapdeng ki bor pynïaid jong ka College bad ka sorkar ha kine ki sngi yn pynbha pynmiat sa kiwei de bynta ba donkam.
Kum ban shu pynkymmaw ha kine ki bnai bala dep ka KNGCSU kala dep ban buh hakhmat ïa ki jingdawa na ka sorkar ban don ki Security Guard ha ki Hostel jong ka College, ban pynheh ïa Boys Hostel, ban don la ki jong ki jaiñ ‘Personalized Graduation gowns’ kiba pyndonkam haka por lehkmen ki samla kiba la pyndep ia ka jingpule na ka College. Nalor Ka jingdawa ban don ïa ki nonghikai (Lecturer) ha ka Subject Khasi, kynthup lang ïa ka jingpynbha ïa ka Library bad ka jingpynbiang ia ki kot pule.
Ka Union ka kyrmen skhem ba kine ki jingdawa kin sa urlong noh hapoh kine ki khyndiat por khnang ban long ka jingmyntoi kaba khraw ïa ki samla pule jong ka Ri-Lum Jaiñtia hi baroh kawei.
