Ka jingialap (kanbas) elekshon MP sha ka iingdorbar Lok Sabha jong ka ri India kan kut mynta ka janmiet bad shwa ba ka por kan kut hiar u Bah Robertjune Kharjarin sha Jowai bad pynlong ia ka jingialang paidbah ha Iawthymme (Iewthymmai) Ladthadlaboh Jowai ban kyrpad ia ki Nongthep Vote jong ka Rilum Jaiñtia ban ai ka jingkyrshan jong ki ha kane ka kynti ban mihkhmat sha Parliament (Lok Sabha) da u Kyrtong jong ka Regional Democratic Alliance (RDA), u Kyrtong uba la pynieng lang da ka United Democratic Party (UDP) bad ka Hill State People Democratic Party (HSPDP).
U Kyrtong ionglang jong ka UDP & HSPDP, bah Robertjune Kharjahrin uba long ruh u Candidate jong ka RDA, haba kren ha kane ka sngi, u ong ba ki paidbah Nongthep Vote jong ka Rilum Jaiñtia ki long kiba ieid ia ka Party United Democratic Party (UDP) bad ia ka Party Hill State People Democratic Party (HSPDP), kumta u wan sha ki bad kyrpad ia ki ba kin sngewbha ban kyrshan ia u, u kyrtong ionglang jong ki ar party (UDP& HSPDP) ba un ioh long u nongmihkhmat jong ka 1-Shillong Parliamentary seat ha kane ka kynti. U bah Kharjahrin u ong ruh ba lada ki paidbah kin kyrshan bad un ioh ia ka jingjop, u kular skhem ba un sa kren bad dawa hapoh ka Dorbar Lok Sabha ba ka sorkar India kan shahskhor bad ban tyntreikam ia baroh ki mat jingdawa kiba ka Regional Democratic Alliance (RDA) ka la kdew ha ka elekshon Manifesto (jingkular elekshon) jong ka.
Ha kane ka jingialang la ioh ia ka jingkren na u ma Treilang Suchiang, MDC JHADC, ma Finely Bareh, MDC JHADC bad na u ma Laski Rymbai u ba long ruh u Deputy Chief Executive Member jong ka JHADC. Baroh ki Nongkren ki la kyntu bad kyrpad ia ki paidbah nongthep vote ka Rilum Jaiñtia ba kin kyrshan pura ha kane ka kynti ia u bah Robertjone Kharjarin bad lyngba ka jingkyrshan ba pura jong ki khlem artatein u bah Khajarin un wan ha ka jingjop kaba donburom ba un mihkhmat ia ki paidbah nongshong shnong jong ka 1-Shillong Parliamentary, ia ka jylla Meghalaya bad ia ka Ri India hi baroh kawei. Ha kane ka sngi ia ka jingialang la pyniaid da u ma Marki Mulieh, Ex-MDC JHADC.