Ka khubor Pulit ba la iohlum la iathuh ba ha ka 22-04-2026, ki Pulit kila ioh jingtip na ki traishnong jong ka Wahlarung, Lumshnong ba ka don kawei ka met iap jong u rangbah briew kaba la thiah lyngktar harud nala u surokbah NH-06.
Na ka liang ki Pulit kila leit mar mar sha katei ka jaka ban pynlong ia ka jingjurip. Ha ka jingtohkit ki Pulit kila ioh jingtip ba utei u rangbah ba la khlad la tip kyrteng kum u Abdul Latif uba don ha ka rta ba 51 snem, khun jong u Alal Uddin, na ka shnong Ambari Part-III, Rangguili, Goalpara, Assam.
Hadien ka jingpyndep ia ki kyndon aiñ baroh, la leit buh ia katei ka met iap ha jaka buh metiap jong ka Khliehriat Civil Hospital, East Jaintia Hills. La kyntu ruh ia ki ba don jingiadei bad utei uba la khlad ban wan shimti ia ka met ba dangsah jong u.
Ki Pulit ki kyntu ia kino kino kiba don jingtip shaphang kiba haïing jong utei uba la khlad noh ba kin pyntip shaphang kane ka jingjia.