Ka jingjiew jong ka jingshit ha ki ba bun ki bynta jong ka ri India ka la wanrah ka jingeh kaba khraw khamtam ia ki nongtrei bylla sngi kiba hap ban trei habar pyrshah ia ka jingthang jong ka sngi. Kane ka jia ruh ha nongbah Delhi.
Kumta ban ai lad ia ki nongtrei bylla ban kiar na ka jingshoh jong ka sngi, ka Myntri Rangbah jong ka Delhi ka Rekha Gupta kala ong ba ka sorkar Delhi kala wad ki lad ki lynti ban iada ia ki nongshong shnong na kane ka jingkiew jong ka jingshit kyrang. Kumta shi bynta ban ai ka jingiada ia ki nongtrei bylla kiba hap ban shah ia ka jingshit kyrang jong ka sngi, kala bthah ia baroh ki nongaikam bylla sngi ba ki dei ban ai por shongthait ia ki nongtrei jong ki haduh 3 kynta kata naduh ka por 1:00PM haduh 4:00 PM.
Ka Rekha ka ong ba kane ka jingiohlad jong ki nongtrei ban shongthait kan long shi bynta na ka lad ban iada ia ki na ka jingshoh kyrang ka sngi hapoh kitei ki por, kumjuh ban lait na kino kino ki jingpang jingshitom kiba lah ban jia na ka jingkiew jong ka jingshit.
Shuh shuh kane ka Myntri Rangbah kala ong ba ka sorkar Delhi kala phah ia ki volunteer ban pynbiang umdih kiba don lang bad ki ORS ha ki jaka paidbah kum ha ki Bus Stand, ki Hospital bad kumta ter ter, ban ai sha ki nongleit nongwan, bad kala kyntu ruh lada don kino kino ki jaka ba duna ki lah ban ai jingtip khnang ba yn lah ban pynbiang.