U ma L. War kum uwei na ki nongtrei monsngewbha ka Ri-Lum Jaiñtia ula pan da ka RTI na ka tnad PWD ha kaba ïadei bad ki kam ai Contract bad ka rukom pyntrei ïa u surok sha ka Kshaid Chympe na Siejrongheng uba jrong kumba 12 Km.
Ïa une u surok la wan ban buh mawnongrim da u Myntri Rangbah ka sorkar jylla u Conrad K. Sangma ha ka 28 tarik u Jymmang, 2026.
Lyngba ka RTI bala ïoh jubab na u Executive Engineer ka Khliehriat Division haka 07.07.26 la ïathuh ka jinglut ban pyntrei ïa utei u surok kala kynjoh sha ka Rs. 46 klur tam, katba ïa ki jingtip kiba ïadei bad ka rukom ai Contract bad kiwei de ym shem la ai jubab satia da u Chief Engineer ka PWD (Roads).
Namar ka jingbym pat ïoh jubab na u Chief Engineer, naka liang u ma L. War ula ujor noh sha u Chief Information Commissioner bad tad hadien katto katne sngi ula ïoh ïa ka jubab na u Chief Engineer ha ka 06 August 2026.
Haka jubab jong u Chief Engineer la lap ba ka jingai Contract ka long tang sha kito ki briew kiba ïajan eh bad ki MLA kumjuh ki sahep ka PWD bad ïa kane ka kam Contract la ai da kaba leh sopsop lyngba ka Short Notice Inviting Tender.
Halor kane ka jinglap u ma L. War ula ong kane ka rukom khot Contract da ka Short Notice Inviting Tender ka long pyrshah ïa ki kyndon treikam jong ka tnad PWD.
Kum u nongwad RTI ula ong ïa ki jingtip ba khambniah shuh shuh halor ka rukom soi Contract ïa u surok bad kiwei de ki kam u dang ap bad mar ïa ïoh un leit ban ujor shi syndon da ka PIL sha ka High Court ba donburom khnang ba kane ka kam leh sopsop ka PWD bad ka rukom ai kam Contract kin kut noh shi syndon, khnang ban ïoh jingmyntoi lem ki paidbah bad kiwei de ki Contractor.